ఎక్కువ జీతం ఏ ఉద్యోగం చేస్తే వస్తుంది? ఈ ప్రశ్న వినగానే అందరూ చెప్పేది ఐటీ సెక్టార్. అయితే అది ఒక కోణం మాత్రమే. సాఫ్ట్వేర్ రంగానికి దీటుగా.. ఆధునిక ప్రపంచంలో ఎక్కువ వేతనాలు ఇచ్చే అనేక ప్రొఫెషన్స్ పుట్టుకొచ్చాయి. కొన్ని ఉద్యోగాలు అసలు చేసినట్లుగా ఉండవు.. కానీ ఆ పనులకు భారీగా వేతనాలు ఉంటాయి. అలాంటి ఉద్యోగాలు వాటి వేతనాల వివరాలు మీ కోసం.
ఇన్‌స్టాగ్రామ్‌ ఇన్‌ఫ్లూయెన్సర్‌
అమెరికాకు చెందిన వోక్స్ వెబ్సైట్ నివేదిక ప్రకారం ప్రపంచంలో ఎక్కువ సంపాదిస్తున్న వారి జాబితాలో ఇన్‌స్టాగ్రామ్‌ ఇన్‌ఫ్లూయెన్సర్స్ కూడా ఉన్నారు. వీరు పెట్టే పోస్టుల ద్వారా ఏడాదికి రూ.30వేల డాలర్ల( రూ.22లక్షల) నుంచి లక్ష డాలర్లు(రూ.74లక్షలు) వరకు సంపాదిస్తున్నారు.
ఇన్‌స్టా ఇన్‌ఫ్లూయెన్సర్స్ వస్త్ర, అందం, ఆహార, హోటల్స్ తదితర రంగాల్లో వ్యాపార ప్రకటనలను తమ పోస్టుల ద్వారా ప్రమోట్ చేస్తుంటారు. మిలియన్ ఫాలోవర్స్ ఉన్న వారు అయితే ఒక్క పోస్టుకు 2.5లక్షల డాలర్లు(రూ.1.8కోట్లు) సంపాదిస్తున్నట్లు 'వోక్స్' చెబుతోంది. వీరు ప్రకటనల కోసం ఎక్కడికి పోనవసరం లేదు. హాయిగా ఇంట్లో నుంచే ప్రకటనలను ప్రమోట్ చేసి భారీగా సంపాదిస్తున్నారు.
ప్రొఫెషనల్ బెడ్ వార్మర్
'ప్రొఫెషనల్ బెడ్ వార్మర్' ట్రెండ్ 2017లో ప్రారంభమైంది. ప్రధానంగా స్టార్ హోటళ్లలో బెడ్ వార్మర్ ప్రొఫెషనల్స్ కనిపిస్తుంటారు. వినియోగదారుల సౌకర్యార్థం హోటళ్ల యాజమాన్యాలు వారిని నియమించుకుంటాయి.
కొంతమందికి నిద్రపోయే ముందు బెడ్ చల్లగా ఉంటే నిద్రపట్టదు. అయితే ఆ బెడ్ను వెచ్చగా ఉంచేందుకు 'ప్రొఫెషనల్ వార్మర్' దానిపై 10 నుంచి 20 నిమిషాలు పడుకుంటారు. పరుపు వెచ్చగా అయ్యాక ప్రొఫెషనల్ వార్మర్స్ వెళ్లిపోతారు. వినియోగదారుడు వచ్చి నిద్రపోతాడు.
ప్రపంచంలోనే మొట్టమొదటి ప్రొఫెషనల్ బెడ్ వార్మర్గా విక్టోరియా ఇవాచ్యోవా గుర్తింపు పొందారు. 2017లో ఆమె ఈ వృత్తిలోకి ప్రవేశించారు. ఈ పనికి గానూ ఆమెకు ఒక రాత్రికి 65 పౌండ్లను చెల్లిస్తారు. ఈ ట్రెండ్ ఎక్కువగా యూకేలాంటి పాశ్చాత్య దేశాల్లోని స్టార్ హోటల్స్లో కనిపిస్తుంది.
ఐస్క్రీమ్ టేస్టర్
ఐస్క్రీమ్ ఇండస్ట్రీలో రుచిని బట్టి గిరాకీ ఉంటుంది. అందుకే ప్రపంచ మార్కెట్లో 'ఐస్క్రీమ్ టేస్టర్'కు ఉండే డిమాండ్ అంతా ఇంతా కాదు. బడా బడా కంపెనీలు భారీ మొత్తాల్లో వేతనాలు చెల్లించి వారిని నియమించుకుంటాయి.
పే స్కేల్ డేటా ప్రకారం.. ఫుడ్ సైన్స్లో పరిశోధన చేసిన సైంటిస్టు ఏడాదికి 60వేల డాలర్లు( దాదాపు రూ.45 లక్షలు) సంపాదిస్తున్నాడు. అదే ఐస్క్రీమ్ టేస్టర్ మాత్రం 40 వేల డాలర్ల(రూ.30లక్షలు) నుంచి లక్ష డాలర్ల(రూ.74.88 లక్షలు) వరకు వేతనంగా పొందుతున్నాడు. దీన్ని బట్టే అర్థం చేసుకోవచ్చు రుచి చూసేవాడికి ఎంత ప్రాధాన్యం ఉందో.
గుర్రం వ్యాయామకారులు
గుర్రాలతో వ్యాయామం చేయించేవారికి అమెరికాలో మంచి ఆదరణ ఉంది. రేస్ క్లబ్లలో వీరిని ఎక్కువగా నియమించుకుంటారు. వారికి వేతనాలను కూడా భారీగా ఉంటాయి.
అమెరికాలో 2020 డిసెంబర్ 28 నాటికి ఒక వ్యాయామకారుడు ఏడాదికి 57,514 డాలర్లు (రూ. 43లక్షలు) వేతనం పొందుతున్నాడు. విద్యార్హత, అనుభవం, అదనపు నైపుణ్యాలను బట్టి వార్షిక వేతనం 71,050 డాలర్ల ( రూ.53లక్షలు) వరకు ఉంటుంది.
మ్యూజిక్ థెరపీ..
మానసిక అనారోగ్యంతో దీర్ఘకాలంగా బాధపడుతున్న వారికి మ్యూజిక్ థెరపీ ఔషధంగా పనిచేస్తుంది. శారీరక అనారోగ్యాలతో ఇబ్బంది పడేవారికి జీవన కాలన్ని పెంచుతుంది.
ప్రపంచవ్యాప్తంగా మంచి డిమాండ్ ఉన్న ప్రొఫెషన్ ఇది. మ్యూజిక్ థెరపిస్టులు ఏడాదికి సగటున 48వేల డాలర్లు (రూ.36లక్షలు) సంపాదిస్తున్నారు. అనుభవం ఉన్న వారు 55వేల డాలర్ల (41లక్షలు) వరకు గడిస్తున్నారు.
గోల్ఫ్ బాల్ డైవర్
గోల్ఫ్ బాల్ డైవర్లు ఏడాదికి 50వేల డాలర్ల(రూ.37లక్షలు) నుంచి లక్ష డాలర్ల(రూ.74.88 లక్షలు) వరకు సంపాదిస్తున్నారు. కానీ ఇది కొంచెం రిస్కుతో కూడుకున్నది.
గోల్ఫ్ ప్లేయర్లు కొట్టిన బంతులు దూరంగా లేదా గ్రౌండ్లోని కొలనుల్లో పడుతుంటాయి. అయితే ప్లేయర్లు వాటిని తెచ్చుకునే వీలు పడక అలాగే వదిలేస్తారు. వాటిని గోల్ఫ్ బాల్ డైవర్లు సేకరించి.. కొత్తగా గోల్ఫ్ నేర్చుకునే వారికి విక్రయిస్తారు. అవి చాలా ఖరీదైనవి కావడం వల్ల గోల్ఫ్ బాల్ డైవర్లకు ఆదాయం కూడా దండిగా వస్తుంది.
ఇదీ చూడండి: ఏసీ కొంటున్నారా? ఈ విషయాలు తప్పక తెలుసుకోండి
