Yogi on Kerala: యూపీ అసెంబ్లీ ఎన్నికల తొలి విడత ఎన్నికల వేళ సీఎం యోగి ఆదిత్యనాథ్‌ చేసిన వ్యాఖ్యలపై కేరళ ముఖ్యమంత్రి పినరయి విజయన్‌ కౌంటర్‌ ఇచ్చారు. భాజపాకు ప్రజలు ఓటు వెయ్యకుండా తప్పు చేస్తే.. ఉత్తరప్రదేశ్‌ కూడా ఓ కశ్మీర్, కేరళ, బెంగాల్‌లా మారుతుందన్న యోగి వ్యాఖ్యలపై ట్విటర్‌లో దీటుగా స్పందించారు. ఉత్తర్‌ప్రదేశ్‌ కేరళలా మారిపోతే ప్రజలకు మంచి విద్య, నాణ్యమైన వైద్య సేవలు, సామాజిక సంక్షేమం, మంచి జీవన ప్రమాణాలు, మతాలు, కులాల పేరిట హత్యల్లేని ఓ సామరస్య సమాజం ఏర్పడుతుందనే యోగి ఆదిత్యనాథ్‌ భయపడుతున్నారంటూ చురకలంటించారు. యూపీ ప్రజలు ఇలాంటి అభివృద్ధే కోరుకుంటున్నారని విజయన్‌ పేర్కొన్నారు.
మరోవైపు, కేరళలో సీపీఎం నేతృత్వంలోని ఎల్‌డీఎఫ్‌ ప్రభుత్వం 100 రోజుల కార్యక్రమంలో భాగంగా చేపట్టిన కార్యక్రమాలను విజయన్‌ ట్విటర్‌లో వెల్లడించారు. ఈ కార్యక్రమం కింద రూ.17,183 కోట్ల వ్యయంతో చేపట్టిన 1,557 ప్రాజెక్టుల్లో భాగంగా 53 కొత్త పాఠశాల భవనాలను ప్రారంభించినట్టు తెలిపారు. ఆ పాఠశాలల భవనాలను ట్విటర్‌లో పంచుకున్నారు. తమ ప్రభుత్వం గత ఐదేళ్లలో ప్రభుత్వ పాఠశాలల్లో మౌలిక వసతుల కల్పన కోసం రూ.5వేల కోట్ల పెట్టుబడి పెట్టిందన్నారు. ఫలితంగా 9.34లక్షల కొత్త అడ్మిషన్లు వచ్చాయని వెల్లడించారు.
రాహుల్ ఏమన్నారంటే..?
UP Elections 2022: యోగి వ్యాఖ్యలనుద్దేశించి రాహుల్.. భారత స్ఫూర్తిని అవమానించవద్దని అన్నారు. అనేక భాషలు, సంస్కృతుల సమ్మేళనమే ఈ దేశ బలం. కశ్మీర్ నుంచి కేరళ వరకు గుజరాత్ నుంచి బంగాల్ వరకు భారత్ చాలా అందమైన దేశమని చెప్పారు. ఇలాంటి దేశాన్ని అవమానించవద్దని అన్నారు.
అద్భుతాలు జరుగుతాయి..!
యోగి వ్యాఖ్యలపై కాంగ్రెస్ సీనియర్ నాయకుడు శశి థరూర్ స్పందించారు. కశ్మీర్ అందం, బంగాల్ సంస్కృతి, కేరళ విద్యతో ఉత్తర్ప్రదేశ్లో అద్భుతాలు జరుగుతాయని అన్నారు. భాజపా అధికారంలోకి రాకపోతేనే అది సాధ్యమవుతుందని చెప్పారు.
ఇదీ చదవండి: 'ఈడీ, సీబీఐ ఒత్తిడి నాపై పని చేయదు.. మోదీ చెప్పిందదే'
