సాగు చట్టాలకు వ్యతిరేకంగా ఉద్యమిస్తున్న రైతులు.. ప్రధానమంత్రి గౌరవానికి విలువనిస్తారని భారతీయ కిసాన్ యూనియన్ జాతీయ అధ్యక్షుడు నరేశ్ తికాయత్ తెలిపారు. అదే సమయంలో తమ ఆత్మగౌరవాన్ని రక్షించుకోవడానికి కూడా కట్టుబడి ఉన్నారని పేర్కొన్నారు. రైతులతో చర్చలు జరిపేందుకు ఫోన్కాల్ దూరంలోనే తమ ప్రభుత్వం ఉందని మోదీ అన్న మాటల నేపథ్యంలో నరేశ్ తికాయిత్ ఈ మేరకు వ్యాఖ్యానించారు.
"ప్రధానమంత్రి గౌరవానికి మేము విలువనిస్తాము. ప్రభుత్వం- పార్లమెంట్ మా ముందు తలవంచాలని మేం కోరుకోవడం లేదు. కానీ మా ఆత్మగౌరవాన్ని మేము ఎల్లప్పుడూ కాపాడుకుంటాం. అరెస్టు(ట్రాక్టర్ ర్యాలీ హింసపై) చేసిన వారిని ప్రభుత్వం వెంటనే విడుదల చేయాలి. చర్చల కోసం అనుకూల వాతావరణాన్ని ఏర్పాటు చేయాలి. మా సమస్యకు మర్యాదపూర్వక పరిష్కారం లభిస్తుందని మేం ఆశిస్తున్నాం. ఒత్తిడి మధ్య మేము ఏ నిర్ణయాన్ని అంగీకరించబోము."
-- నరేశ్ తికాయత్, రైతు సంఘం నేత
జనవరి 26న నిర్వహించిన ట్రాక్టర్ ర్యాలీలో ఎర్రకోట వద్ద చోటుచేసుకున్న పరిణామాలు కుట్రపూర్వకంగా జరిగాయని నరేశ్ తికాయత్ ఆరోపించారు. అన్ని జెండాల కంటే త్రివర్ణ పతాకానికి ఉన్నతమైన స్థాయి ఉంటుందని చెప్పారు. తాము జాతీయ పతాకాన్ని అగౌరవపర్చబోనివ్వమని స్పష్టం చేశారు.
'అప్పటివరకు కదిలివెళ్లం..'
ఘాజిపుర్ సరిహద్దులో ఉద్యమిస్తున్న రైతులకు పెద్దఎత్తున మద్దతు లభిస్తోందని బీకేయూ ప్రతినిధి రాకేశ్ తికాయిత్.. ఈటీవీ భారత్తో అన్నారు. చుట్టు పక్కల జిల్లాల నుంచి ఎంతో మంది రైతులు ఈ ఉద్యమంలో పాల్గొనేందుకు వస్తున్నారని స్పష్టం చేశారు. పోలీసులు తమను ఖాళీ చేయించాలని ప్రయత్నిస్తున్నప్పటికీ.. చట్టాలను రద్దు చేసేంతవరకు తాము ఎక్కడికీ కదలమని స్పష్టం చేశారు. సరైన వాతావరణంలో చర్చలు జరుగుతాయని ఆశిస్తున్నట్లు చెప్పారు.
ప్రభుత్వం తమకు నీళ్ల సరఫరా ఆపేసిందని రాకేశ్ తికాయిత్ తెలిపారు. రైతులే తమ ఇళ్ల నుంచి ఇక్కడకు నీరును తీసుకొస్తున్నారని చెప్పారు. తమ ఆందోళన శాంతిపథంలోనే కొనసాగుతోందని.. ఇక ముందు కూడా ఇదే విధంగా ఉంటుందని వెల్లడించారు.
ఇదీ చదవండి:రైతు గుండె చప్పుడు- రాకేశ్ టికాయిత్!
