ఉత్తరాఖండ్లో జరిగిన ఘోర ప్రమాదంలో ఐదుగురు ప్రాణాలు కోల్పోయారు. ముగ్గురు తీవ్రంగా గాయపడ్డారు. చంపావత్ జిల్లా పూర్ణగిరిలో గురువారం ఉదయం జరిగిందీ ఘటన.
ఉత్తరాది రాష్ట్రాల్లో బుధవారం ఛైత్ర నవరాత్రి వేడుకలు మొదలయ్యాయి. ఈ సందర్భంగా ఉత్తరాఖండ్లో పేరుగాంచిన పూర్ణగిరి మేళాకు ఉత్తర్ప్రదేశ్ నుంచి కొందరు భక్తులు వచ్చారు. పూర్ణగిరిలోని ఓ బస్టాండ్ వద్ద రాత్రి నిద్రపోయారు. అయితే.. ఓ బస్సు రూపంలో మృత్యువు వారిపైకి దూసుకొచ్చింది. ఏం జరిగిందో తెలిసేలోపే ఐదుగురు ప్రాణాలు కోల్పోగా.. మరో ముగ్గురు గాయపడ్డారు.
సమాచారం అందుకున్న పోలీసులు వెంటనే ఘటనాస్థలికి చేరుకుని సహాయక చర్యలు చేపట్టారు. క్షతగాత్రులను సమీపంలోని తనక్పుర్ జిల్లా ఆస్పత్రికి తరలించారు. బస్సు బ్రేకులు ఫెయిల్ అవ్వడం వల్లే ఈ ప్రమాదం జరిగి ఉంటుందని పోలీసులు ప్రాథమికంగా నిర్ధరించారు. దీంతో పూర్ణగిరిలో ఒక్కసారిగా విషాదఛాయలు అలుముకున్నాయి. మృతుల్లో ఓ మహిళ ఉన్నట్లు పోలీసులు తెలిపారు. చనిపోయిన వారందరూ ఉత్తర్ప్రదేశ్లోని బహ్రైచ్ జిల్లాకు చెందినవారని వెల్లడించారు.
"మృతులందరూ ఉత్తర్ప్రదేశ్కు చెందినవారు. వారు పూర్ణగిరి మేళాకు వెళ్లేందుకు బస్టాండ్లో ఉండగా ఈ ఘోర ప్రమాదం జరిగింది. ఈ ప్రమాదానికి బస్సు బ్రేకులు ఫెయిల్ అవ్వడమే కారణమని భావిస్తున్నాం. ఈ ఘటనపై సమగ్ర దర్యాప్తు చేస్తాం. క్షతగాత్రులను త్వరితగతిన ఆస్పత్రికి తరలించాం. పరిస్థితి విషమించినవారికి వేరే ఆస్పత్రుకి వైద్యులు సిఫార్సు చేశారు."
--పోలీసులు
వైద్య దంపతులు మృతి..
మహారాష్ట్ర చంద్రాపుర్లో ఘోర రోడ్డు ప్రమాదం జరిగింది. ఎదురుగా వస్తున్న కారును ఓ ట్రక్కు ఢీకొట్టింది. ఈ ఘటనలో వైద్య దంపతులు మృతి చెందారు. వరోరా-వానీ రహదారిపై బుధవారం మధ్యాహ్నం జరిగిందీ ఘటన. మృతులను అతుల్ గౌర్కర్, అశ్విని గౌర్కర్‌గా పోలీసులు గుర్తించారు.
'ఎదురుగా వస్తున్న ట్రక్కును వైద్య దంపతులు ప్రయాణిస్తున్న కారు ఢీకొట్టింది. ఈ ప్రమాదంలో అశ్విని అక్కడికక్కడే మృతి చెందారు. ఆమె భర్త అతుల్ ఆస్పత్రికి తరలిస్తుండగా మార్గమధ్యలోనే తుదిశ్వాశ విడిచారు.' అని పోలీసులు తెలిపారు.
జిల్లా జడ్జిని ఢీకొట్టిన బైక్..
మహారాష్ట్రలోని కొల్హపుర్ రోడ్డు ప్రమాదం జరిగింది. ద్విచక్ర వాహనంతో ఓ వ్యక్తి జిల్లా జడ్జిని ఢీకొట్టాడు. ఈ ఘటనలో జడ్జికి తీవ్రంగా గాయాలయ్యాయని పోలీసులు తెలిపారు. ప్రస్తుతం ఆయన ఐసీయూలో ఉన్నారని పేర్కొన్నారు. వెంటిలేటర్ సపోర్టుతో జడ్జికి వైద్యం చేస్తున్నారని వెల్లడించారు. ఈ ఘటనలో ద్విచక్ర వాహనదారుడు అనిల్ జాదవ్‌పై పోలీసులు కేసు నమోదు చేశారు. బైకర్ అనిల్కు కూడా గాయాలయ్యాయని చెప్పారు.
