చోరీకి పాల్పడ్డ దొంగలు ఎక్కడైనా ఆ సామాన్లను తిరిగి ఇచ్చేయడం చూశారా? అయితే మీరు తప్పక ఈ దొంగతనం గురించి తెలుసుకోవాల్సిందే. ఉత్తర్ప్రదేశ్ ఘాజియాబాద్లోని ఓ ఇంట్లో నాలుగు రోజుల క్రితం చోరీ చేసిన దొంగ.. తిరిగి ఆ ఇంటికే వస్తువులను పార్సిల్ పంపించాడు.
ఇదీ జరిగింది..
ఘాజియాబాద్లోని రాజానగర్ ఎక్స్‌టెన్షన్ పరిధిలో ఓ టీచర్ నివాసముంటున్నారు. అయితే పని మీద కొద్ది రోజుల క్రితం వేరే ప్రాంతానికి వెళ్లారు. ఇదే అదునుగా చూసుకుని ఆ ఇంట్లో ఉన్న బంగారు ఆభరణాలతో పాటు కొన్ని సామాన్లను దొంగలు కాజేశారు. అక్టోబర్ 27న తిరిగి వచ్చి చూస్తే.. ఇల్లంతా చెల్లాచెదురుగా కనిపించింది. దీంతో షాక్కు గురైన టీచర్ పోలీస్ స్టేషన్లో ఫిర్యాదు చేశారు. కేసు నమోదు చేసుకుని దర్యాప్తు చేపట్టిన పోలీసులు.. ఆ సొసైటీలోని సీసీటీవీ ఫుటేజ్ను పరిశీలించారు. అందులో దొంగ ఆ ఇంటికి వచ్చి వెళ్లే దృశ్యాలు రికార్డయ్యాయి.
ఇంతలోనే ఆ ఇంటికి ఓ పార్సిల్ రావడం కలకలం రేపింది. అందులో ఏముందోనని భయపడిన టీచర్ కుటుంబం.. ఆ పార్సిల్ను పోలీసులకు అప్పజెప్పింది. పార్సిల్ ఓపెన్ చేసి చూస్తే అందులో దొంగతనానికి గురైన కొన్ని ఆభరణాలు ఉన్నాయి. ఆ దొంగ నిజాయితీగా వస్తువులను తిరిగి పంపించాడని కొందరు అంటుంటే.. ఇది కచ్చితంగా ఏదో కుట్రలో భాగమని మరికొందరు అనుమానిస్తున్నారు. అంతే కాకుండా ఆ పార్సిల్పై ఉన్న అడ్రస్ కూడా ఫేక్ అని పోలీసుల విచారణలో తేలింది.
ఇదీ చదవండి: పుట్టిన రోజునే పిల్లలపై పెట్రోల్ పోసి నిప్పంటించిన తండ్రి.. వైఫై పాస్వర్డ్ కోసం బాలుడి హత్య
