Corbevax Vaccine: 12-18 ఏళ్ల పిల్లలకు మరో టీకా అందుబాటులోకి రానుంది. బయోలాజికల్-ఇ సంస్థకు చెందిన కార్బెవాక్స్ వ్యాక్సిన్ అత్యవసర అనుమతికి డ్రగ్స్ కంట్రోలర్ జనరల్ ఆఫ్ ఇండియాకు చెందిన నిపుణుల కమిటీ సిఫార్సు చేసినట్లు అధికారిక వర్గాలు వెల్లడించాయి. రెండు డోసుల కింద పంపిణీ చేసే ఈ వ్యాక్సిన్కు త్వరలోనే ఆమోదం లభిస్తుందని తెలిపాయి.
ఈ టీకా ధర రూ.145 (పన్నులు కాకుండా) ఉండొచ్చని అధికారిక వర్గాలు భావిస్తున్నాయి. త్వరలోనే 12 ఏళ్లలోపు పిల్లలకు కూడా సంస్థ టీకాలను అందుబాటులోకి తేనున్నట్లు పేర్కొన్నాయి. ఇందుకోసం క్లీనికల్ ట్రయల్స్కు అవసరమయ్యే డేటాను కూడా త్వరలోనే సంస్థ సమర్పించనుందని తెలిపాయి.
ఈ టీకాకు ఆమోదం లభిస్తే.. 12-18 ఏళ్ల పిల్లల వ్యాక్సినేషన్కు అందుబాటులోకి వచ్చిన రెండో టీకాగా నిలుస్తుంది.
మరోవైపు పెద్దల వ్యాక్సినేషన్కు సంబంధించి గతేడాది ఆగస్టులో కేంద్రం 30 కోట్ల కార్బెవాక్స్ టీకా డోసులను ఆర్డర్ చేసింది. ఇటీవల మరో 5 కోట్ల డోసులను ఆర్డర్ చేసింది. ప్రికాషనరీ డోసులకు ప్రాధాన్యం పెరిగిన నేపథ్యంలో కేంద్రం ఈ నిర్ణయం తీసుకుంది.
ఇదీ చూడండి : రూపాయికే మెడిసిన్.. పేదల పాలిట 'స్టాలిన్'
