SCO Meeting Goa 2023 : షాంఘై కోఆపరేషన్ ఆర్గనైజేషన్(ఎస్సీఓ) సమావేశంలో పాల్గొనేందుకు పాకిస్థాన్ విదేశాంగ మంత్రి బిలావల్ భుట్టో జర్దారీ గురువారం గోవా చేరుకున్నారు. ఎస్సీఓ కౌన్సిల్ ఆఫ్ ఫారిన్ మినిస్టర్స్ సమావేశంలో పాల్గొననున్నారు. 2011 తర్వాత భారత్‌లో పర్యటిస్తున్న తొలి పాకిస్థాన్ విదేశాంగ మంత్రిగా బిలావల్ నిలిచారు. సీమాంతర ఉగ్రవాదానికి మద్దతు ఇవ్వడం సహా అనే అంశాల్లో పాక్పై భారత్ గుర్రుగా ఉంది. ఈ నేపథ్యంలో భుట్టో భారత్ రావడం ప్రాధాన్యం సంతరించుకుంది. అయితే, భారత విదేశాంగ మంత్రి ఎస్ జైంకర్, భుట్టో మధ్య ఎలాంటి ద్వైపాక్షిక సమావేశాలు లేవని తెలుస్తోంది. పాక్ నుంచి కూడా ఎలాంటి అభ్యర్థనలు రాలేవని సమాచారం.
"షాంఘై కోఆపరేషన్ ఆర్గనైజేషన్‌లో పాల్గొనడం కోసం గోవాకు వచ్చినందుకు సంతోషంగా ఉన్నాను. ఎస్సీఓలో పాకిస్థాన్ ప్రతినిధి బృందానికి నేను నాయకత్వం వహిస్తున్నాను. ఎస్సీఓ చార్టర్ పట్ల పాకిస్థాన్కు ఉన్న బలమైన నిబద్ధత వల్లే ఈ సమావేశానికి హాజరు కావాలనే నిర్ణయం తీసుకున్నాం. ఎస్సీఓ విదేశాంగ మంత్రుల మండలి (సీఎఫ్ఎమ్) విజయవంతమవుతుందని ఆశిస్తున్నాను. ఈ సమిట్లో నా సహచర విదేశాంగ మంత్రులతో సమావేశాలు నిర్వహిస్తాను."
-బిలావల్ భుట్టో జార్దారీ, పాకిస్థాన్ విదేశాంగ మంత్రి
సలాం ఇండియా..: భుట్టో
SCO Summit 2023 Bilawal Bhutto statement : భారత్కు విచ్చేసిన అనంతరం ఓ వీడియోను ట్వీట్ చేసిన బిలావల్.. గోవా నుంచి భారత్కు సలాం అంటూ పేర్కొన్నారు. తొలుత తాను మొదట రష్యా విదేశాంగ మంత్రితో సమావేశమవుతానని తెలిపారు. తర్వాత ఉజ్బెకిస్తాన్ విదేశాంగ మంత్రితో ద్వైపాక్షిక సమావేశంలో పాల్గొననున్నట్లు వెల్లడించారు.
మాండరిన్ బదులు ఇంగ్లీష్.. ఇండియా డిమాండ్
ఎస్సీఓ అధికారిక భాషగా ఉన్న మాండరిన్, రష్యన్ భాషల బదులు.. ఇంగ్లీష్ను ఉపయోగించాలని ఈ సమావేశాల్లో భారత్ పట్టుబట్టే అవకాశం ఉంది. ఎస్సీఓలో ఉన్న మరికొన్ని దేశాలు కూడా ఇదే ఆలోచనలో ఉన్నట్లు తెలుస్తోంది. ఈ సమిట్కు సంబంధించిన దస్త్రాలు అన్ని ఈ రెండు భాషల్లోనే ప్రిపేర్ చేస్తారు. రష్యా, చైనా కాకుండా ఈ రెండు భాషలను గ్రూప్లో ఉన్న మరో నాలుగు దేశాలు విరివిగా ఉపయోగిస్తాయి. ఇక్కడ తీసుకున్న నిర్ణయాలకు జులైలో దిల్లీలో జరగనున్న ఎస్సీఓ శిఖరాగ్ర సదస్సులో ఆమోదం తెలపనున్నారు.
'సెక్యూర్-SCO' అనే ఇతివృత్తంతో భారత్ ఈ సమావేశాలను నిర్వహిస్తోంది. ఎస్సీఓలో ఉన్న దేశాల్లో బహుపాక్షిక, రాజకీయ, భద్రత, ఆర్థిక, ప్రజల మధ్య పరస్పర చర్యలను ప్రోత్సహించడానికి భారత్ ప్రాధాన్యత ఇస్తోంది. ఎస్సీఓ చివరి సమావేశం ఉజ్బెకిస్థాన్‌లోని సమర్‌ఖండ్‌లో జరిగింది.
ప్రస్తుతం ఎస్సీఓలో ఇండియా, పాకిస్థాన్, చెనా, రష్యా, కజక్స్థాన్, కిర్గిస్థాన్, తజకిస్థాన్, ఉజ్బెకిస్థాన్ ఉన్నాయి. ఎస్సీఓ ప్రధాన కార్యాలయం బీజింగ్లో ఉంది. భారత్ 2017లో ఎస్సీఓలో జాయిన్ అయింది. అప్పటి నుంచి ఇండియా ఈ సమిట్కు అధ్యక్షత వహించడం ఇదే తొలిసారి.
