SC on Sex workers: కరోనా వైరస్‌ వ్యాప్తి నేపథ్యంలో చాలా మంది జీవితాలు తలకిందులయ్యాయి. ఆర్థిక సమస్యలతో సతమతవుతున్నారు. వైరస్‌ ప్రభావం సెక్స్‌వర్కర్లపై తీవ్ర ప్రభావం చూపింది. ఇదే జీవనాధారంగా బతుకుతున్న లక్షల మంది రోడ్డున పడ్డారు. వీరిలో రేషన్ కార్డులు కూడా ఉండనివారెందరో. ఇలాంటి విపత్కర పరిస్థితుల్లో కనీసం రేషన్ బియ్యానికి కూడా నోచుకోలేక పోతున్నారు. అలాంటి వారందరికీ న్యాయం చేయాలంటూ దాఖలైన పిటిషన్‌పై జస్టిస్‌ ఎల్‌ఎన్‌రావు, జస్టిస్‌ హేమంత్‌ గుప్తాతో కూడిన ధర్మాసనం విచారణ చేపట్టింది. రేషన్ కార్డు లేకపోవడాన్ని మానవ తప్పిదంగా పరిగణించి వారం రోజుల్లోగా వారికి అవసరమైన రేషన్ సదుపాయం కల్పించాలని రాష్ట్ర ప్రభుత్వాలను ఆదేశించింది. అంతేకాకుండా జాతీయ విపత్తు నిర్వహణ చట్టం ప్రకారం వారికి సాయం చేయాలని కేంద్రానికి సూచించింది.
Sex workers Supreme court news
Ration cards for Sex workers
గత మార్చి 24 తర్వాత దేశ వ్యాప్తంగా లాక్‌డౌన్‌ విధించిన నేపథ్యంలో చాలా మంది సెక్స్‌వర్కర్లు జీవనోపాధి కోల్పోయారని దర్బార్‌ మహిళా సమన్వయ కమిటీ సుప్రీం కోర్టులో పిటిషన్‌ దాఖలు చేసింది. అప్పటి నుంచి వారంతా అప్పులు తెచ్చుకొని జీవితాన్ని నెట్టుకొస్తున్నారని, అలాంటి వారందరికీ న్యాయం చేయాలని పిటిషన్‌లో పేర్కొంది. దీనిపై విచారణ చేపట్టిన అత్యున్నత న్యాయస్థానం ఈ మేరకు తీర్పు వెలువరించింది. ప్రస్తుతం ఆంధ్రప్రదేశ్‌, కర్ణాటక, మహారాష్ట్ర, తెలంగాణ, తమిళనాడు రాష్ట్రాల్లో కేవలం 52 శాతం మంది సెక్స్‌వర్కర్లకు మాత్రమే రేషన్ సదుపాయమున్నట్లు సీనియర్‌ అడ్వకేట్‌ అనంద్‌ గ్రోవర్‌ తెలిపారు.
ఇదీ చదవండి: 'మాతృభాషలో బోధిస్తేనే.. పిల్లల్లో విశ్వాసం'
