విమానాశ్రయాల ప్రాధికార సంస్థ(ఏఏఐ) నిర్లక్ష్యం కారణంగా మరణించిన వ్యక్తి భార్యకు మరో రూ. 50 వేలు చెల్లించాలని సుప్రీంకోర్టు ఆదేశించింది.
2012లో కోల్కతా విమానాశ్రయంలో ఓ ప్రయాణికునికి గుండెపోటు రాగా అక్కడి సిబ్బంది ఆయనను సమీపంలోని ఆసుపత్రికి తీసుకెళ్లడంలో నిర్లక్ష్యంగా వ్యవహరించారు. దాంతో ఆయన ప్రాణాలు కోల్పోయాడు. దీనిపై ఆయన భార్య జాతీయ వినియోగదారుల ఫోరంను ఆశ్రయించారు. ఆమెకు రూ. 10 లక్షల పరిహారం చెల్లించాలని 2015లో ఫోరం ఆదేశించింది.
దీన్ని సవాల్ చేస్త ఏఏఐ సుప్రీంకోర్టుకు వెళ్లింది. సుప్రీంకోర్టులో అపీలు దాఖలు చేసే ముందు పరిహారంలో సగం మొత్తాన్నిగానీ, రూ. 50 వేలనుగానీ, ఏది తక్కువయితే అది.. కక్షిదారుల నిధి కింద జమ చేయాల్సి ఉంటుంది. ఈ మేరకు ఏఏఐ రూ. 50 వేలను జమ చేసింది. అపీలును కొట్టివేస్తే ఈ మొత్తాన్ని బాధితులకు ఇవ్వాల్సి ఉంటుంది.
ఏఏఐ చేసిన అపీలును 2019లో సుప్రీంకోర్టు తిరస్కరించింది. రూ. 10 లక్షల పరిహారంతో పాటు, దానిపై 9 శాతం వడ్డీ, కోర్టు ఖర్చుల కింద రూ. 20 వేలు ఇవ్వాలని ఏఏఐని ఆదేశించింది. ప్రస్తుతం కక్షిదారుల నిధి కింద జమచేసిన రూ. 50 వేలను కూడా ఆ మహిళకే ఇవ్వాలని శుక్రవారం తీర్పు చెప్పింది.
ఇదీ చూడండి: 'ఆ తీర్పు చదువుతుంటే తలనొప్పి వచ్చింది'
