Road Accident In Madhya Pradesh : పెళ్లికి వెళ్తున్న ఓ మినీ ట్రక్కు ప్రమాదవశాత్తు నదిలో బోల్తా పడింది. ఈ ప్రమాదంలో 12 మంది మృతి చెందారు. మరో 30 మందికి పైగా గాయపడినట్లు సమాచారం. మధ్యప్రదేశ్‌లోని దతియా జిల్లాలో బుధవారం ఈ ఘోర ప్రమాదం జరిగింది. దుర్సాడ పోలీస్ స్టేషన్ పరిధిలో వేగంగా వెళ్తున్న మినీ ట్రక్కు బుహరా నదిలో బోల్తా పడింది. సమాచారం అందుకున్న పోలీసులు సహాయక చర్యలు చేపట్టారు. జిల్లా కలెక్టర్, ఎస్పీ ప్రదీప్ శర్మ సహా ఉన్నతాధికారులు ప్రమాద స్థలానికి చేరుకుని సహాయక చర్యలను పర్యవేక్షించారు. వీరంతా ఓ వివాహ వేడుకకు వెళ్తుండగా ప్రమాదం జరిగింది.
ఇదీ జరిగింది
గ్వాలియర్కు బిల్హెటి గ్రామానికి చెందిన ప్రజలు.. టికంగఢ్లో జరుగుతున్న ఓ వివాహానికి హాజరయ్యేందుకు ఓ మినీ ట్రక్కులో వెళ్తున్నారు. ఈ క్రమంలోనే బుహరా గ్రామంలోని వంతెన వద్దకు రాగానే అదుపుతప్పి నదిలో బోల్తా పడింది. ఈ ప్రమాదంలో 12 మంది మరణించారు. మరో 30 మంది వరకు గాయపడినట్లు సమాచారం. ప్రమాద సమయంలో ట్రక్కులో 50 మందికి పైగా ఉన్నట్లు తెలుస్తోంది. దీనిపై సమాచారం అందుకున్న పోలీసులు.. ఘటనా స్థలానికి చేరుకుని సహాయక చర్యలు చేపట్టారు. గాయపడిన వారిని సమీపంలోని ఆస్పత్రికి తరలించారు. మృతుల సంఖ్య మరింత పెరిగే అవకాశం ఉందని పోలీసులు తెలిపారు. ఇప్పటి వరకు ఐదు మృతదేహాలను వెలికితీశారు అధికారులు. వీరిలో ముగ్గురు చిన్నారులు కాగా.. ఓ యువకుడు, వృద్ధురాలు ఉన్నారు. వీరంతా వధువును తీసుకుని పెళ్లికి వెళ్తుండగా ప్రమాదం జరిగినట్లు చెప్పారు. దీంతో పెళ్లి జరగాల్సిన వారి ఇంట విషాద ఛాయలు అలుముకున్నాయి.
ప్రమాదంపై హోంమంత్రి విచారం
దతియా జిల్లాలో జరిగిన ప్రమాదంపై మధ్యప్రదేశ్ హోంమంత్రి నరోత్తం మిశ్రా విచారం వ్యక్తం చేశారు. మృతుల కుటుంబాలకు సంతాపం తెలిపారు. ప్రమాదం జరిగిన వెంటనే అధికారులతో చర్చించి.. సహాయక చర్యలను వేగవంతం చేయాలని ఆదేశించారు. బాధిత కుటుంబాలను అన్ని విధాలా ఆదుకుంటామని హామీ ఇచ్చారు.
కరెంట్ షాక్ తగిలి నలుగురు మహిళలు మృతి
బిహార్లో మంగళవారం పొలంలో కూలీ పని చేసేందుకు వచ్చిన నలుగురు మహిళలు కరెంట్ షాక్తో మృతిచెందారు. వరి నాట్లు వేస్తుండగా 11వేల ఓల్టేజ్ ఉన్న కరెంట్ తీగ తగలడం వల్ల నలుగురు అక్కడికక్కడే ప్రాణాలు కోల్పోయారు. ఈ ఘటనలో మరో ఇద్దరు మహిళలు గాయపడ్డారు. వారు పనిలో నిమగ్నమై ఉండగా ఈ ప్రమాదం జరిగినట్లు తెలుస్తోంది. పూర్తి వివరాల కోసం ఇక్కడ క్లిక్ చేయండి.
