రాష్ట్రపతిగా నా ఎన్నిక.. దేశ పేదలందరి విజయం: ముర్ము

Draupadi Murmu: భారత 15వ రాష్ట్రపతిగా బాధ్యతలు స్వీకరించిన ద్రౌపదీ ముర్ము.. తనను అత్యున్నత పదవికి ఎన్నిక చేసినందుకు అందరికీ ధన్యవాదాలు తెలిపారు. రాష్ట్రపతి బాధ్యతలు స్వీకరించడం గౌరవంగా భావిస్తున్నట్లు పేర్కొన్నారు. రాష్ట్రపతిగా తన ఎన్నిక కోట్లాది భారతీయుల విశ్వాసానికి ప్రతీక అని అన్నారు. రాష్ట్రపతిగా గెలుపొందడం తన ఒక్కరి ఘనత కాదని.. దేశ ప్రజలందరికీ దక్కిన విజయంగా ముర్ము అభివర్ణించారు. పేద ప్రజలు కలలు కని.. నిజం చేసుకోగలరనేందుకు తన ఎన్నికే నిదర్శనం అని పేర్కొన్నారు. పార్లమెంట్​ సెంట్రల్​హాల్​ వేదికగా రాష్ట్రపతిగా ప్రమాణ స్వీకారం చేసిన అనంతరం తొలిసారి ప్రసంగించిన ఆమె ఈ వ్యాఖ్యలు చేశారు.

ఆజాదీకా అమృత్​ మహోత్సవ్​ వేళ.. భారత రాష్ట్రపతిగా ఎన్నిక కావడం సంతోషంగా ఉందని అన్నారు ముర్ము. దేశంలో సమ్మిళిత అభివృద్ధి కోసం, అట్టుడుగు ప్రజల అభ్యున్నతి కోసం కృషి చేస్తానని పునరుద్ఘాటించారు. అందరి సహకారంతో ఉజ్వల యాత్ర కొనసాగిస్తానని తెలిపారు.

''దేశ ప్రజల విశ్వాసం నిలబెట్టుకునేందుకు కృషి చేస్తా. భారత్​ 'ఆజాదీకా అమృత్​ మహోత్సవ్​' ఉత్సవాలు జరుపుకుంటోంది. ఉత్సవాల వేళ రాష్ట్రపతిగా ఎన్నిక కావడం సంతోషంగా ఉంది. 50 ఏళ్ల స్వాతంత్య్ర వేడుకల వేళ నా రాజకీయ జీవితం ప్రారంభమైంది. 75 ఏళ్ల ఉత్సవాల వేళ రాష్ట్రపతిగా ఎన్నిక కావడం సంతోషంగా ఉంది. ఒడిశాలోని చిన్న ఆదివాసీ గ్రామం నుంచి వచ్చి.. అత్యున్నత పదవి చేపట్టడం గౌరవంగా భావిస్తున్నా.''

- ద్రౌపదీ ముర్ము, భారత 15వ రాష్ట్రపతి

ఇవీ చూడండి: రాష్ట్రపతి రబ్బర్‌ స్టాంపేనా?.. అసలీ పేరెలా వచ్చింది?