ఉదయ్పుర్లో దారుణ హత్యకు గురైన దర్జీ కన్హయ్య లాల్ కుటుంబ సభ్యులను రాజస్థాన్ ముఖ్యమంత్రి అశోక్ గహ్లోత్ గురువారం పరామర్శించారు. హత్యకు సంబంధించిన వివరాలను అడిగి తెలుసుకున్నారు. కుటుంబ సభ్యులకు ధైర్యం చెప్పారు. అనంతరం గహ్లోత్ మీడియాతో మాట్లాడారు. జాతీయ దర్యాప్తు సంస్థ (ఎన్‌ఐఏ) ఈ కేసు విచారణను నిర్ణీత సమయంలో పూర్తి చేయాలని కోరారు. తీర్పు త్వరగా వెలువడేలా ఫాస్ట్ ట్రాక్ కోర్టు ఏర్పాటు చేయాలన్నారు. ఉదయ్పుర్లో కట్టుదిట్టమైన భద్రతా ఏర్పాట్లు చేసినట్లు సీఎం పేర్కొన్నారు.
ఉదయ్‌పుర్లోని ఏడు పోలీస్స్టేషన్ల పరిధిలో విధించిన కర్ఫ్యూ ఇంకా కొనసాగుతోంది. ఇద్దరు అడిషనల్ డైరెక్టర్ జనరల్, ఒక డిప్యూటీ ఐజీ, ఇతర సీనియర్ అధికారులు నగరంలో శాంతిభద్రతలను పర్యవేక్షిస్తున్నారు.
భారీ ర్యాలీ: కన్హయ్య లాల్ హత్యకు నిరసిస్తూ.. ఉదయ్పుర్లో 'సర్వ్ హిందూ సమాజ్' ఆధ్వర్యంలో ర్యాలీ నిర్వహించారు. పోలీసుల అనుమతితో ఈ ర్యాలీ నిర్వహించడం వల్ల ఎలాంటి ఉద్రిక్త పరిస్థితులు నెలకొనలేదు. కర్ఫ్యూ ఉన్న ప్రాంతాల్లో.. ఈ ర్యాలీ కోసం ఆంక్షలు సడలించినట్లు అదనపు డీజీ దినేష్‌ ఎంఎన్‌ వెల్లడిచారు.
ఐరాస స్పందన: కన్హయ్య లాల్ హత్యపై ఐక్యరాజ్య సమితి స్పందించింది. అన్ని మతాలను గౌరవించాలని, ప్రపంచవ్యాప్తంగా ఉన్న అన్ని వర్గాలు సామరస్యంగా మెలగాలన్నారు ఐరాస ప్రధాన కార్యదర్శి ఆంటోనియో గుటెర్రస్. ఈ మేరకు గుటెర్రస్ అధికార ప్రతినిధి స్టీఫెన్ దుజార్రిక్ వెల్లడించారు. ప్రపంచ ప్రజల నుంచి తాము శాంతిని ఆశిస్తున్నట్లు చెప్పారు.
ఇదీ చదవండి: 'మహా' సీఎంగా ఫడణవీస్.. డిప్యూటీ సీఎంగా శిందే.. ముహూర్తం ఫిక్స్!
