Punjab CM deplaned in Frankfurt : పంజాబ్ ముఖ్యమంత్రి భగవంత్ మాన్ ఎయిర్పోర్ట్ వివాదంపై కేంద్రం దృష్టిసారించింది. మద్యం మత్తులో ఉన్న మాన్ను విమానం నుంచి దించేశారని వచ్చిన ఆరోపణలను పరిశీలిస్తున్నట్లు పౌర విమానయాన శాఖ మంత్రి జ్యోతిరాదిత్య సింధియా పేర్కొన్నారు. ఈ ఘటనపై నిజానిజాలు తేల్చడం ముఖ్యమని సింధియా అన్నారు. "ఈ ఘటన విదేశాల్లో జరిగింది. కాబట్టి నిజాలు నిర్ధరించుకోవాల్సిన అవసరం ఉంది. లుఫ్తాన్సా ఎయిర్లైన్ను వివారాలు కోరతాం. సమాచారం ఇవ్వాలా లేదా అన్న విషయం ఎయిర్లైన్ పరిధిలోనిదే. నాకు అందిన రిక్వెస్ట్ ప్రకారం.. ఈ విషయంపై దృష్టిసారిస్తా" అని ఓ కార్యక్రమంలో పాల్గొన్న సింధియా స్పష్టం చేశారు.
ఏం జరిగిందంటే?
ఇటీవల 8 రోజుల జర్మనీ పర్యటనకు వెళ్లారు పంజాబ్ సీఎం. ఆదివారం భారత్కు తిరిగొచ్చారు. అయితే.. ఆయన ప్రయాణించిన విమానం రాక ఆలస్యం కాగా.. ఈ ఆరోపణలు తెరపైకి వచ్చాయి. మాన్.. దిల్లీకి తిరిగి వస్తుండగా విమానం నుంచి దించేశారంటూ శిరోమణి అకాలీదళ్ అధినేత సుఖ్బీర్ సింగ్ బాదల్ ఆరోపించారు. శనివారం మాన్తోపాటు జర్మనీలోని ఫ్రాంక్ఫర్ట్ నుంచి దిల్లీ వస్తున్న విమానంలో ఉన్న ప్రయాణికులు ఈ విషయం చెప్పారంటూ ట్వీట్ చేశారు. మద్యం మత్తులో, కనీసం నడవలేని స్థితిలో మాన్ ఉన్నారని ట్వీట్లో పేర్కొన్నారు.
ఈ వ్యవహారం రాష్ట్రంలో తీవ్ర చర్చనీయాంశంగా మారింది. మాన్ తన పదవికి రాజీనామా చేయాలని కాంగ్రెస్ నేత ప్రతాప్ సింగ్ బజ్వా డిమాండ్ చేశారు. ఈ ఘటనపై దర్యాప్తునకు ఆదేశించాలని పౌర విమానయాన శాఖ మంత్రి సింధియాకు లేఖ రాశారు. కాగా, ఈ ఆరోపణలను ఆమ్ఆద్మీ పార్టీ ఖండించింది. ఇవన్నీ తప్పుడు ప్రచారాలని పేర్కొంది. సీఎంను అగౌరపరిచేందుకు విపక్షాలు నీచ రాజకీయాలు చేస్తున్నాయని మండిపడింది. 'పంజాబ్కు పెట్టుబడులు తెచ్చేందుకు సీఎం నిరంతరం పనిచేస్తున్నారని వారు ఓర్వలేకపోతున్నారు. సీఎం షెడ్యూల్ ప్రకారమే తిరిగి వచ్చారు' అని పార్టీ ప్రధాన ప్రతినిధి మాల్విందర్ సింగ్ కాంగ్ తెలిపారు.
'విమానం మార్చడం వల్లే ఆలస్యం'
ఈ ఘటనపై ట్విట్టర్లో స్పందించిన లుఫ్తాన్సా ఎయిర్లైన్.. విమానం ఆలస్యంగా బయల్దేరడంపై వివరణ ఇచ్చింది. దిల్లీకి రావాల్సిన విమానాన్ని మార్చడం వల్లే ప్రయాణం ఆలస్యమైందని తెలిపింది. ఇందుకు సంబంధించి ఇతర ప్రయాణికుల వివరాలను వెల్లడించడానికి నిరాకరించింది. ఓ ప్రయాణికుడు మత్తులో ఉండటం వల్లే ఆలస్యమైనట్లు వచ్చిన వార్తలను ఖండించింది.
