మహారాష్ట్రలో ప్రముఖ పుణ్యక్షేత్రం పండర్పుర్లో రెండు రోడ్డు ప్రాజెక్టుల పనులకు వర్చువల్గా శంకుస్థాపన చేశారు ప్రధానమంత్రి నరేంద్ర మోదీ. శ్రీ సంత్ జ్ఞానేశ్వర్ మహారాజ్ పల్లకీ మార్గ్ (NH-965), శ్రీ సంత్ తుకారాం మహారాజ్ పల్లకీ మార్గ్లో(NH-965G) నాలుగు లైన్ల రహదారి పనులను ప్రారంభించారు. ఈ రహదారులకు ఇరువైపులా భక్తులు నడిచేందుకు కాలినడక మార్గాన్ని కూడా నిర్మించనున్నారు.
పండర్పుర్ను దేశంలోనే స్వచ్ఛమైన పుణ్యక్షేత్రంగా తీర్చిదిద్దుతామని ప్రజలు తనకు మాటివ్వాలని మోదీ కోరారు. పల్లకీ మార్గ్ దారిలో చెట్లు నాటి, భక్తులకు తాగునీటి సౌకర్యం కూడా ఏర్పాటు చేయాలని సూచించారు. పండర్పుర్ ఆనందం, శ్రేయస్సుకు ప్రతీక అని, ఈ ప్రాంతానికి అనుసంధానిస్తూ 225కి.మీ జాతీయ రహదారి నిర్మాణాన్ని ప్రారంభించడం సంతోషంగా ఉందన్నారు.
ఈ కార్యక్రమంలో కేంద్ర రోడ్డు రవాణా, రహదారుల శాఖ మంత్రి నితిన్ గడ్కరీ, సహాయ మంత్రి వీకే సింగ్, మహారాష్ట్ర ప్రతిపక్ష నేత దేవేంద్ర ఫడణవీస్ పాల్గొన్నారు.
భారత్మాల పరియోజన ద్వారా వైష్ణో దేవి, గోల్డెన్ టెంపుల్, రిషికేశ్, హరిద్వార్, చార్ ధామ్ వంటి అన్ని తీర్థయాత్ర ప్రదేశాల్లో రూ.12,070 కోట్లు వెచ్చింది 673కి.మీ మేర రహదారులు నిర్మించినట్లు గడ్కరీ వివరించారు. సుప్రీంకోర్టు అనుమతి తర్వాత మరో 827కి.మీ రహదారి నిర్మాణాన్ని పూర్తి చేస్తామన్నారు.
ఇదీ చూడండి: 'హైకోర్టు మాజీ జడ్జి పర్యవేక్షణలో లఖింపుర్ కేసు విచారణ'
