కేంద్ర సమాచార సాంకేతిక శాఖ మంత్రి రవిశంకర్ ప్రసాద్, కాంగ్రెస్ ఎంపీ శశి థరూర్ ఖాతాలను ట్విట్టర్ ఏ ప్రాతిపదికన నిలిపివేసిందో చెప్పాలని ఆదేశించింది ఐటీ వ్యవహారాల పార్లమెంటరీ స్టాండింగ్ కమిటీ. ఈ మేరకు ట్విట్టర్ నుంచి రెండు రోజుల్లో లిఖితపూర్వక సమాధానం రాబట్టాలని కమిటీకి నేతృత్వం వహిస్తున్న థరూర్.. సెక్రటేరియట్కు సూచించారు.
చుట్టుముడుతున్న చిక్కులు
ఐటీ నిబంధనల విషయంలో కేంద్రంతో ప్రతిష్టంభన కొనసాగుతున్న వేళ.. రోజురోజుకు చిక్కుల ఊబిలో పడుతోంది ట్విట్టర్. ఇటీవలే భారతదేశ పటాన్ని వక్రీకరించి ప్రదర్శించింది. తీవ్ర స్థాయిలో విమర్శలు వెల్లువెత్తగా కొద్ది గంటల్లోనే ఆ మ్యాప్ను తొలగించింది. ఈ వ్యవహారంపై మంగళవారం ఒక్కరోజే ఆ సంస్థపై రెండు కేసులు నమోదయ్యాయి. సంస్థ భారత కార్యాలయ సీనియర్ అధికారులపై ఉత్తర్ప్రదేశ్, మధ్యప్రదేశ్లలో ఎఫ్ఐఆర్లు దాఖలయ్యాయి.
ఇక బాలల లైంగిక వేధింపులకు సంబంధించిన సమాచారాన్ని అనుమతించడం, దానిపై ఎలాంటి చర్యలు తీసుకోనందున జాతీయ బాలల హక్కుల కమిషన్ ఫిర్యాదు మేరకు ట్విట్టర్పై కేసు నమోదు చేసినట్లు దిల్లీ పోలీసులు తెలిపారు.
మరోవైపు, ముస్లిం వృద్ధుడిపై దాడి వ్యవహారంలో ట్విట్టర్ ఇండియా ఎండీ మనీశ్ మహేశ్వరిపై చర్యలు తీసుకోరాదని కర్ణాటక హైకోర్టు తీర్పును సవాల్ చేస్తూ సుప్రీంకోర్టును ఆశ్రయించారు యూపీ పోలీసులు.
ఇవీ చూడండి:
