Sharad Pawar On Maharashtra Crisis : మహారాష్ట్రను, దేశాన్ని మతపరంగా విభజించే శక్తులపై పోరాటం చేయాలన్నారు నేషనలిస్ట్ కాంగ్రెస్ పార్టీ(ఎన్సీపీ) అధినేత శరద్ పవార్. ఇతర పార్టీలను విచ్ఛిన్నం చేసేందుకు.. బీజేపీ చేస్తున్న వ్యూహాలకు మన ప్రజలు కొందరు బలైపోయారని ఆయన ఆవేదన వ్యక్తం చేశారు. సతారా జిల్లాలోని కరాడ్లో పార్టీ శ్రేణులను, మద్దతుదారులను ఉద్దేశించి మాట్లాడిన శరద్ పవార్.. ఈ మేరకు వ్యాఖ్యానించారు. ఎన్సీపీని చీల్చి మహారాష్ట్ర ఉప ముఖ్యమంత్రిగా అజిత్ పవార్ ప్రమాణ స్వీకారం చేసిన మరుసటి రోజే.. శరద్ పవార్ ఈ వ్యాఖ్యలు చేయడం ప్రాధాన్యం సతరించుకున్నాయి.
"మహారాష్ట్రలో, దేశంలో ప్రజలను మతపరంగా విభజించే ప్రయత్నాలు జరుగుతున్నాయి. శాంతియుతంగా ఉన్న ప్రజల్లో భయాన్ని నింపే శక్తులపై మనం పోరాటం చేయాలి. దేశంలో ప్రజాస్వామ్యాన్ని రక్షించాల్సిన అవసరం ఉంది." అని శరద్ పవార్ వ్యాఖ్యానించారు. కొన్ని వర్గాలు కులం, మతం పేరుతో సమాజం మధ్య చిచ్చు పెడుతున్నాయని ఆయన పేర్కొన్నారు. సోమవారం గురు పూర్ణిమ సందర్భంగా తన గురువు, మహారాష్ట్ర మొదటి ముఖ్యమంత్రి యశ్వంతరావు చవాన్ స్మారక చిహ్నానికి నివాళులు అర్పించారు శరద్ పవార్. అనంతరం పార్టీ శ్రేణులు, మద్దతుదారులను ఉద్దేశించి మాట్లాడారు.
అంతకుముందు.. సోమవారం ఉదయం పుణె నుంచి కరాడ్ వెళుతున్న శరద్ పవార్కు.. భారీ సంఖ్యలో మద్దతు తెలిపారు అభిమానులు. రోడ్డుకు ఇరువైపుల నిలబడి అభివాదం చేస్తూ.. తమ మద్దతును తెలియజేశారు. కరాడ్లోనూ వేల మంది అభిమానులు శరద్ పవార్కు స్వాగతం పలికారు. కార్యక్రమంలో కాంగ్రెస్ సీనియర్ నేత పృథ్వీరాజ్ చవాన్ సైతం పాల్గొన్నారు.
త్వరలో ముఖ్యమంత్రిగా అజిత్ పవార్!
త్వరలోనే ముఖ్యమంత్రి ఏక్‌నాథ్ శిందే స్థానాన్ని అజిత్ పవార్ భర్తీ చేస్తారని.. ఉద్ధవ్ ఠాక్రే నేతృత్వంలోని శివసేన నాయకుడు సంజయ్ రౌత్ పునరుద్ఘాటించారు. సంవత్సరం క్రితం శివసేనను చీల్చి బయటకు వచ్చిన వారిలో 16 మంది ఎమ్మెల్యేలు అనర్హతకు గురవుతారని ఆయన జోస్యం చెప్పారు. శివసేన, ఎన్సీపీ, కాంగ్రెస్ ఉమ్మడిగానే మహారాష్ట్రలో పోటీ చేస్తాయని రౌత్ పేర్కొన్నారు. "బీజేపీ శివసేన, ఎస్సీపీ, కాంగ్రెస్ను చీల్చుతోంది. వారికి ఇది ఎట్టి పరిస్థితుల్లోనూ ప్రయోజనకరంగా ఉండదు. ఎన్సీపీ నేతలు అవినీతి పాల్పడ్డరాన్న ప్రధాని.. ఇప్పుడు వారినెందుకు రాజ్భవన్లో ప్రమాణ స్వీకారం చేయించారు?". అని సంజయ్ రౌత్ ప్రశ్నించారు.
ఆ 8 మంది ఎన్సీపీ ఎమ్మెల్యేలపై తగిన చర్యలు: మహారాష్ట్ర స్పీకర్
మంత్రులుగా ప్రమాణ స్వీకారం చేసిన 8 మంది ఎన్సీపీ ఎమ్మెల్యేలపై.. తగిన చర్యలు తీసుకుంటానని మహారాష్ట్ర అసెంబ్లీ స్పీకర్ రాహుల్ నర్వేకర్ సోమవారం వెల్లడించారు. ఆ 8 మంది ఎమ్మెల్యేలపై.. ఎన్సీపీ వేసిన అనర్హత పిటిషన్ తనకు అందిందని ఆయన వెల్లడించారు. దాన్ని పూర్తిగా అధ్యయనం చేసి చట్టపరంగా ముందుకు వెళతానని రాహుల్ వివరించారు.
