Mukesh Ambani Gets Death Threat : ప్రముఖ వ్యాపారవేత్త, రిలయన్స్ ఇండస్ట్రీస్ అధినేత ముకేశ్ అంబానీకి మరోసారి బెదిరింపులు రావడం కలకలం రేపింది. అంబానీ కంపెనీకి చెందిన ఓ ఈ-మొయిల్‌ ఐడీకి శుక్రవారం.. గుర్తుతెలియని వ్యక్తి నుంచి బెదిరింపు మెయిల్ వచ్చింది. "మా దగ్గర మంచి షూటర్లున్నారు. రూ.20కోట్లు ఇవ్వకపోతే చంపేస్తాం" అని ఆ మెయిల్‌లో ఆగంతకులు బెదిరింపులకు పాల్పడ్డారు.
Mukesh Ambani Death Threat : దీంతో ముకేశ్ అంబానీ సెక్యూరిటీ ఇన్‌ఛార్జ్‌ ముంబయి గామ్‌దేవీ పోలీసులకు ఫిర్యాదు చేశారు. ఈ ఘటనపై కేసు నమోదు చేసిన పోలీసులు దర్యాప్తు చేపట్టారు. షాదాబ్ ఖాన్‌ అనే వ్యక్తి నుంచి ఆ బెదిరింపు మెయిల్ వచ్చినట్లు గుర్తించారు. అతడి కోసం గాలిస్తున్నట్లు పోలీసులు తెలిపారు.
అంబానీ ఇంటర్నేషనల్ స్కూల్ను పేల్చేస్తామని..
కొన్ని నెలల క్రితం.. ముంబయిలోని ధీరూభాయ్ అంబానీ ఇంటర్నేషనల్ స్కూల్ను పేల్చేస్తామని కాల్ చేసి బెదిరించాడు ఓ వ్యక్తి. జనవరి 10వ తేదీన నిందితుడు.. స్కూల్కు బాంబు బెదిరింపు కాల్ చేశాడు. స్కూల్ను పేల్చేస్తామని బెదిరించాడు. స్కూల్ ల్యాండ్లైన్ నెంబర్కు ఈ కాల్ వచ్చిందని పోలీసులు తెలిపారు. పాఠశాలలో టైమ్ బాంబ్ పెట్టానని ఫోన్లో చెప్పి నిందితుడు కాల్ కట్ చేశాడని చెప్పారు. బెదిరింపు కాల్ రాగానే స్కూల్ యాజమాన్యం పోలీసులకు ఫిర్యాదు చేసింది. కేసు నమోదు చేసుకున్న పోలీసులు.. వెంటనే దర్యాప్తు చేపట్టారు. బాంబ్ స్క్వాడ్ను రంగంలోకి దించి తనిఖీలు నిర్వహించారు. పాఠశాలలో ఎలాంటి పేలుడు పదార్థాలు దొరకలేదని పోలీసులు స్పష్టం చేశారు.
గతంలో కూడా..
రిలయన్స్ గ్రూప్నకు అనేకసార్లు బెదిరింపు కాల్స్ వచ్చాయి. గతేడాది అక్టోబర్లో రిలయన్స్ ఫౌండేషన్‌ హాస్పిటల్‌కు ఓ వ్యక్తి కాల్ చేసి.. ఆస్పత్రిని పేల్చేస్తామని బెదిరించాడు. అంబానీ కుటుంబానికి చెందిన కొంతమంది సభ్యుల పేర్లు చెప్పి మరీ బెదిరింపులకు పాల్పడ్డాడు. అదే ఏడాది ఆగస్టు 15న కూడా అంబానీ కుటుంబానికి బెదిరింపులు వచ్చాయి. అంబానీతో పాటు ఆయన కుటుంబాన్ని 3 గంటల్లో చంపేస్తామని ఓ ఆగంతుకుడు ఫోన్ చేశాడు.
