జమ్ముకశ్మీర్ అధికార యంత్రాంగం తనను, తన కుమార్తె ఇల్తీజాను మరోసారి గృహ నిర్బంధం చేసిందని ఆరోపించారు పీపుల్స్ డెమొక్రటిక్ పార్టీ అధినేత్రి మెహబూబా ముఫ్తీ. పుల్వామాలోని వహీద్ పర్రా కుటుంబాన్ని కలిసేందుకు.. రెండురోజులుగా తమకు అనుమతినివ్వడం లేదని అన్నారు. వహీద్ పర్రాను నిరాధార ఆరోపణలతో ఎన్ఐఏ అరెస్టు చేసిందని ఆమె వ్యాఖ్యానించారు.
"నన్ను మరోసారి అక్రమంగా గృహ నిర్బంధం చేశారు. వాళ్ల క్రూరత్వానికి అదుపు లేదు. వహీద్ పర్రాను నిరాధార ఆరోపణలతో అరెస్టు చేశారు. పుల్వామాలోని వహీద్ కుటుంబ సభ్యులను కలిసేందుకు జమ్ముకశ్మీర్ అధికార యంత్రాంగం రెండు రోజులుగా అనుమతించటం లేదు. భాజపా మంత్రులు, కార్యకర్తలు కశ్మీర్లో ఎక్కడికైనా వెళ్లగలరు. కానీ, నా విషయంలో మాత్రమే వారికి భద్రతా సమస్యలు ఎదురొస్తాయి. నా కుమార్తె ఇల్తీజాను కూడా గృహ నిర్బంధంలో ఉంచారు."
--మెహబూబా ముఫ్తీ, పీడీపీ అధినేత్రి
వహీద్ పర్రా పీడీపీ నేత. 2019 పార్లమెంటు ఎన్నికల్లో ముఫ్తీ విజయానికి సహకరించాలని హిజ్బుల్ ముజాహిద్దీన్ ఉగ్రసంస్థతో చర్చలు జరపారన్న ఆరోపణలపై పర్రాను ఎన్ఐఏ అరెస్టు చేసింది.
'వ్యక్తిగత స్వేచ్ఛను కాలరాస్తున్నారు'
ముఫ్తీ నిర్బంధంపై జమ్ముకశ్మీర్ మాజీ సీఎం, నేషనల్ కాన్ఫరెన్స్ ఉపాధ్యక్షుడు ఒమర్ అబ్దుల్లా స్పందించారు. ప్రజల వ్యక్తిగత స్వేచ్ఛను ప్రభుత్వం తమ అధీనంలో ఉంచుకుంటోందని ధ్వజమెత్తారు. న్యాయవ్యవస్థ జోక్యం ఏ మాత్రం లేకుండా తమ ఇష్టానుసారం ప్రభుత్వం వ్యవహరిస్తోందని ఆరోపించారు.
