Heroin Seized In Kerala : కేరళ కొచ్చి తీరంలో భారీగా హెరాయిన్ పట్టుబడింది. నార్కోటిక్స్ కంట్రోల్ బ్యూరో, ఇండియన్ నేవీ సంయుక్తంగా ఆపరేషన్ నిర్వహించి ఇరాన్ నుంచి వస్తున్న ఓ పడవలో రూ.200 కోట్ల విలువైన హెరాయిన్ను స్వాధీనం చేసుకున్నారు. పడవలో ఉన్న ఆరుగురు సిబ్బందిని అదుపులోకి తీసుకున్నారు. వీరిపై కేసు నమోదు చేసుకుని దర్యాప్తు చేస్తున్నారు.
రూ.100 కోట్ల హెరాయిన్ స్వాధీనం.. మహారాష్ట్రలోని ముంబయి విమానాశ్రయంలో 16 కేజీల హెరాయిన్ పట్టుబడింది. డైరక్టరేట్ ఆఫ్ రెవెన్యూ ఇంటెలిజెన్స్(డీఆర్ఐ) అధికారులు.. మలావి నుంచి వస్తున్న ఓ ప్రయాణికుడి నుంచి రూ.100 కోట్ల విలువైన హెరాయిన్ స్వాధీనం చేసుకున్నారు. నిందితుడ్ని అదుపులోకి తీసుకుని దర్యాప్తు చేస్తున్నారు.
అధికారుల సమాచారం ప్రకారం..
మలావి నుంచి ఖతార్ మీదుగా ముంబయి వస్తున్న ఓ ప్రయాణికుడు అక్రమంగా మాదకద్రవ్యాలను రవాణా చేస్తున్నాడన్న సమాచారంతో డెరక్టరేట్ ఆఫ్ రెవెన్యూ ఇంటెలిజెన్స్ అధికారులు అప్రమత్తమయ్యారు. ఎయిర్పోర్టులో ఓ అనుమానితుడిని పట్టుకుని తనిఖీ చేయగా అతడి ట్రాలీ బ్యాగ్లో 16 కేజీల హెరాయిన్ దొరికింది. ఈ హెరాయిన్ విలువ సుమారు రూ.100 కోట్లు ఉంటుందని అంచనా వేశారు అధికారులు. అయితే ఈ ఘటనతో సంబంధం ఉన్న ఘనాకు చెందిన మరో మహిళను డీఆర్ఐ అధికారులు అదుపులోకి తీసుకున్నారు.
ఖరీదైన ఏడు వాచ్లు..
దిల్లీలోని ఇందిరాగాంధీ ఎయిర్పోర్ట్లో ఓ ప్రయాణికుడి నుంచి ఏడు ఖరీదైన వాచ్లను స్వాధీనం చేసుకున్నారు కస్టమ్స్ అధికారులు. ఈ వాచ్ల ధర దాదాపుగా రూ.28 కోట్ల వరకు ఉంటుందని అంచనా వేశారు. నిందితుడ్ని అదుపులోకి తీసుకున్నారు.
ఇవీ చదవండి: 'నా భార్య కూడా మీలా తిట్టదు.. ఇలా లవ్ లెటర్స్ పంపదు'.. గవర్నర్కు సీఎం కౌంటర్
