మహారాష్ట్ర మాజీ హోంమంత్రి అనిల్ దేశ్ముఖ్ను ఎన్ఫోర్స్మెంట్ డైరెక్టరేట్(ఈడీ) సోమవారం అర్ధరాత్రి రాత్రి అరెస్టు చేసింది. మనీలాండరింగ్ కేసులో 12 గంటలపాటు ప్రశ్నించిన అధికారులు.. అనంతరం ఆయనను అదుపులోకి తీసుకున్నారు. మనీలాండరింగ్ నిరోధక చట్టంలోని నిబంధనల ప్రకారం ఆయనపై చర్యలు తీసుకున్నట్లు చెప్పారు.
విచారణకు అనిల్ దేశ్ముఖ్ సహకరించలేదని ఈడీ అధికారులు తెలిపారు. మంగళవారం స్థానిక న్యాయస్థానం ఎదుట ఆయనను హాజరు పరిచి, కస్టడీకి అప్పగించాలని కోరుతామని చెప్పారు. విచారణ కోసం.. దక్షిణ ముంబయిలోని బల్లార్డ్ ఎస్టేట్ ప్రాంతంలోని ఈడీ కార్యాలయానికి అనిల్ దేశ్ముఖ్ తన న్యాయవాదులతో కలిసి ఉదయం 11:40 గంటలకు వచ్చారని సంబంధిత వర్గాలు తెలిపాయి. ఈ కేసులో విచారణకు హాజరు కావాలని దేశ్ముఖ్కు ఈడీ ఐదు సార్లు నోటీసులు పంపించింది. అయితే.. ఈ సమన్లను రద్దు చేయాలని కోరుతూ బాంబే హైకోర్టును ఆశ్రయించగా.. న్యాయస్థానం గతవారం తోసిపుచ్చింది. ఈ నేపథ్యంలో.. సోమవారం ఆయన ఈడీ విచారణకు హాజరయ్యారు.
బార్లు, రెస్టారెంట్ల నుంచి ప్రతి నెల రూ.100కోట్లు వసూలు చేయాలని పోలీసు అధికారులపై దేశ్ముఖ్ ఒత్తిడి తెచ్చినట్లు ముంబయి మాజీ సీపీ పరంబీర్‌ సింగ్‌ ఆరోపించారు. ఈ ఆరోపణలపై విచారణ జరిపిన కేంద్ర దర్యాప్తు సంస్థ(సీబీఐ) ఆయనపై కేసు నమోదు చేసింది. సీబీఐ నమోదు చేసిన ఎఫ్ఐఆర్ ఆధారంగా ఈడీ ఆయనపై చర్యలు చేపట్టింది.
ఇదీ చూడండి: మహారాష్ట్ర మాజీ హోంమంత్రి ఇంట్లో సీబీఐ సోదాలు
