అక్రమార్కులపై అధికారులు విరుచుకుపడ్డారు. పాన్-ఇండియా స్థాయిలో చేసిన ఆపరేషన్లో 100 కిలోలకు పైగా బంగారాన్ని స్వాధీనం చేసుకున్నారు. ఈ ఆపరేషన్లో రూ.51 కోట్ల విలువైన బంగారాన్ని మహారాష్ట్ర డైరెక్టరేట్ ఆఫ్ రెవెన్యూ ఇంటెలిజెన్స్ అధికారులు సీజ్ చేశారు. ఇండో-నేపాల్ సరిహద్దులతో పాటు దేశంలోని పలు ప్రాంతాల్లో 'ఆపరేషన్ గోల్డెన్ డాన్' పేరుతో ఈ దాడులు జరిగాయి. ఘటనలో మొత్తం పది మందిని డీఆర్ఐ అధికారులు అరెస్ట్ చేశారు. వీరిలో ముగ్గురు భారతీయులు కాగా.. ఏడుగురు సుడాన్ దేశస్థులు ఉన్నారు. మంగళవారం ఈ దాడులు జరిగినట్లు అధికారులు తెలిపారు.
పట్నా, పుణె, ముంబయిలలో తనిఖీలు జరిపిన తరువాత.. ఇండో-నేపాల్ బార్డర్లో దాడులు జరిపినట్లు అధికారులు తెలిపారు. అనంతరం అక్రమంగా తరలిస్తున్న బంగారాన్ని స్వాధీనం చేసుకున్నట్లు వెల్లడించారు. నిందితుల నుంచి 1.35 కోట్లు విలువ చేసే దేశ, విదేశీ కరెన్సీని సైతం స్వాధీనం చేసుకున్నట్లు పేర్కొన్నారు.
"స్వాధీనం చేసుకున్న బంగారం ఎక్కువగా పేస్ట్ రూపంలో ఉంది. ఈ అక్రమ బంగారమంతా ఇండో-నేపాల్ సరిహద్దు గుండా బిహార్ రాజధాని పట్నాకు తీసుకొచ్చారు. ఆపై రైళ్లు, విమానాల ద్వారా దేశంలోని వివిధ ప్రాంతాలకు నిందితులు బంగారాన్ని తరలిస్తున్నారు. ఎక్కువగా ముంబయికి ఈ బంగారం అక్రమంగా రవాణా అవుతోంది" అని అధికారులు తెలిపారు.
ఆదివారం అర్థరాత్రి ముగ్గురు సూడాన్ దేశస్థులను.. పట్నా రైల్వే స్టేషన్‌లో ముంబయి రైలు ఎక్కుతున్న సమయంలో పట్టుకున్నట్లు డీఆర్ఐ అధికారులు తెలిపారు. 'వీరి వద్ద 37.126 కిలోల బంగారం పేస్ట్ లభ్యమైంది. రహస్యంగా దాచి ఉంచిన 40 పాకెట్లను సైతం ఇద్దరు సూడాన్ దేశస్థుల నుంచి స్వాధీనం చేసుకున్నాం. వారు వేసుకున్న స్లీవ్‌లెస్ జాకెట్‌లలో బంగారాన్ని దాచిపెట్టారు. స్లీవ్‌లెస్ జాకెట్‌లను.. వారు ప్రత్యేకంగా తయారు చేశారు' అని అధికారి తెలిపారు.
'మూడో విదేశీయుడు సరిహద్దు ప్రాంతాల్లో అక్రమ రవాణా కార్యకలాపాలను కోఆర్డీనేట్ చేయడం, బంగారం అక్రమ రవాణాకు ఏర్పాట్లు చేయడం వంటివి చేస్తాడు. మరో ఇద్దరి మహిళ బృందాన్ని సోమవారం పుణెలో అరెస్ట్ చేశారు. హైదరాబాద్ నుంచి ముంబయికి బస్లో వెళుతుండగా వీరిని పట్టుకున్నారు. వీరి నుంచి 5.615 కిలోల బంగారాన్ని స్వాధీనం చేసుకున్నారు. వీరి నుంచి స్వాధీనం చేసుకున్న బంగారం వివిధ రూపంలో ఉందన్నారు. వీటిని హ్యాండ్‌బ్యాగ్‌లలో దాచి ఉంచారు' అని సంబంధిత అధికారులు వెల్లడించారు.
