Covid restrictions Delhi: కరోనా కొత్త వేరియంట్ ఒమిక్రాన్.. దేశాన్ని వణికిస్తోంది. ఇప్పటివరకు కేసులు అత్యల్పంగా ఉన్న దిల్లీలోనూ గత కొన్ని రోజులుగా కొవిడ్ బాధితుల సంఖ్య అనూహ్యంగా పెరుగిపోయింది. ఈ క్రమంలో కఠిన ఆంక్షలు విధించేందుకు దిల్లీ ప్రభుత్వం సన్నద్ధమవుతోంది. ఈ విషయాన్ని దిల్లీ ముఖ్యమంత్రి అరవింద్ కేజ్రీవాల్ ప్రకటించారు. దిల్లీలో ఎల్లో అలర్ట్ జారీ చేస్తూ.. జీఆర్ఏపీ(గ్రేడెడ్ రెస్పాన్స్ యాక్షన్ ప్లాన్)లో భాగంగా పలు ఆంక్షలు విధించినున్నట్టు స్పష్టం చేశారు. వీటిపై త్వరలోనే మరిన్ని వివరాలు ప్రకటిస్తామని పేర్కొన్నారు. దేశ రాజధానిలో తాజా పరిస్థితులపై ఉన్నతస్థాయి సమావేశం నిర్వహించిన అనంతరం ఈ వివరాలను వెల్లడించారు కేజ్రీవాల్.
ఆంక్షలు ఇవే..!
- నైట్ కర్ఫ్యూ అమల్లో ఉంటుంది.
- మెట్రో, బార్లు, ప్రైవేటు ఆఫీసులు.. 50శాతం సామర్థ్యంతో పనిచేస్తాయి.
- పాఠశాలలు, కళాశాలలు, థియేటర్లు మూసివేసి ఉంటాయి.
- బస్సులు 50శాతం సామర్థ్యంతోనే నడుస్తాయి. ఆటోలు, ట్యాక్సీల్లో ఇద్దరు ప్రయాణికులకు మాత్రమే అనుమతి ఉంటుంది.
- వివాహాలు, అంత్యక్రియలకు 20మందికి మాత్రమే అనుమతి
- స్పా, జిమ్లు మూసివేస్తారు.
కొవిడ్ పాజిటివిటీ రేటు 0.5శాతాన్ని దాటితే ఎల్లో అలర్ట్ జారీ చేస్తారు. ప్రస్తుతం అక్కడ పాజిటివిటీ రేటు 0.68శాతంగా ఉంది.
Covid restrictions in Delhi today: దిల్లీలో కేసులు పెరుగుతున్నా.. ఆక్సిజన్, ఆసుపత్రుల్లో పడకలు, ఐసీయూల వినియోగం పెరగలేదు. ఎలాంటి పరిస్థితులనైనా ఎదుర్కొనేందుకు తాము సిద్ధంగా ఉన్నట్టు కేజ్రీవాల్ ఇప్పటికే స్పష్టం చేశారు.
మొత్తం 165 కేసులు..
దేశరాజధానిలో ఒమిక్రాన్ కేసుల సంఖ్య 165కు చేరింది. తాజాగా మరో 23మందికి కొత్త వేరియంట్ సోకినట్టు నిర్ధరణ అయ్యింది.
ఇదీ చూడండి:- దేశంలో మరో 6,358 కరోనా కేసులు
