Karnataka Election Results 2023 : కన్నడనాట గత 38 ఏళ్ల నుంచి ఏ పార్టీ కూడా వరుసగా రెండోసారి తమ అధికారాన్ని నిలబెట్టుకోలేదు. ఈసారి జరిగిన ఎన్నికల్లో ఆ సంప్రదాయం పునరావృతమైంది. అప్పట్లో 1983, 1985 శాసనసభ ఎన్నికల్లో భారతీయ జనతా పార్టీ వరుసగా రెండుసార్లు ప్రభుత్వాన్ని ఏర్పాటు చేసింది. ఆ తర్వాత నుంచి మళ్లీ ఏ ప్రభుత్వం కూడా రెండోసారి అధికారంలోకి రాలేదు. అయితే 2013లో కాంగ్రెస్ గెలవగా.. 2018 ఎన్నికల్లో బీజేపీ అతిపెద్ద పార్టీగా అవతరించింది. అయినప్పటికీ జేడీఎస్తో కలిసి కాంగ్రెస్ ప్రభుత్వాన్ని ఏర్పాటు చేసి వరుసగా రెండోసారి నిలబెట్టుకునే ప్రయత్నాన్ని చేసింది. అయితే సంకీర్ణ ప్రభుత్వం కూలిపోవటం వల్ల బీజేపీ ఆ అధికారాన్ని చేపట్టింది. ఈ ఎన్నికల్లోనూ ఓటర్లు అదే సంప్రదాయాన్ని కొనసాగించారు. కన్నడిగులు హస్తం పార్టీకే పట్టం కట్టారు.
Chamarajnagar Sentiment In Karnataka : చామరాజనగర్ జిల్లా.. కర్ణాటక సీఎంల పాలిట శాపంగా మారిందనే అపవాదును దశాబ్దాల నుంచి ఎదుర్కొంటోంది. చామరాజనగర్లో అడుగుపెట్టిన సీఎం కచ్చితంగా పదవి కోల్పోతారనే నమ్మకం కర్ణాటకలో పాతుకుపోయింది. ఇక తాజా ఫలితాలతో ఇదే విషయం మరోసారి రుజువైంది. ఈ ఎన్నికలకు ముందు సీఎం బసవరాజ్ బొమ్మై రెండుసార్లు ఈ జిల్లాలో పర్యటించారు. అయితే బీజేపీ ఓటమిపాలవ్వడం వల్ల బొమ్మై సీఎం పీఠం దిగకతప్పట్లేదు.
మరోవైపు ఈ నెల 10వ తేదీన జరిగిన కర్ణాటక శాసనసభ ఎన్నికల్లో.. మొత్తం 73.19 శాతం పోలింగ్ నమోదైంది. 2013లో 71.83 శాతం, 2018లో 72.13 శాతం పోలింగ్ నమోదైంది. ఈసారి పట్టణాల కంటే గ్రామీణ ప్రాంతాల్లో అత్యధిక మంది తమ ఓటుహక్కును వినియోగించుకున్నారు. ఇది కూడా హస్తం పార్టీకి కలిసొచ్చినట్లు తెలుస్తోంది. పట్టణాల్లో బీజేపీ ఓటు షేరు 46 శాతంగా ఉండగా కాంగ్రెస్కు 43 శాతం షేరు దక్కింది. సెమీ అర్బన్ ప్రాంతాల్లో కాంగ్రెస్కు 39.9శాతం ఓట్లు పడగా.. బీజేపీకి 36 శాతం ఓటు షేరు దక్కింది. గ్రామీణ ప్రాంతాల్లో కాంగ్రెస్ ఓటు షేరు 44 శాతం ఉండగా.. బీజేపీకి 36 శాతం ఓట్లు దక్కాయి. ఇక సెమీ రూరల్ ప్రాంతాల్లో కాంగ్రెస్కు 44 శాతం ఓట్లు పడగా బీజేపీకు 29 శాతం ఓటు షేరు దక్కింది.
కర్ణాటకలో ఇప్పటివరకు 16 సార్లు శాసనసభ ఎన్నికలు జరిగాయి. కానీ ఇద్దరు నేతలు మాత్రమే పూర్తి స్థాయిలో ఐదేళ్ల సీఎంగా కొనసాగారు. 1972లో దేవ్రాజ్ ఉర్స్ నేతృత్వంలో కాంగ్రెస్ ప్రభుత్వం ఏర్పడగా.. ఆయన ఐదేళ్లపాటు సీఎంగా ఉన్నారు. 2013లో కాంగ్రెస్ మెజార్టీ సాధించటం వల్ల ఆ పార్టీ సీనియర్ నేత సిద్ధరామయ్య ఐదేళ్లు సీఎంగా కొనసాగారు. మిగతా అన్ని సందర్భాల్లో సీఎం కుర్చీని నేతలు, పార్టీలు పంచుకోవడం లేదా ముందస్తు ఎన్నికలకు వెళ్లడం జరిగింది. కానీ ఈ సారి ఎన్నికల్లో కాంగ్రెస్ 136 స్థానాల్లో జయకేతనం ఎగురవేసింది.
ఓ పార్టీకి ఈ స్థాయిలో మెజార్టీ దక్కడం అనేది 34 ఏళ్ల తర్వాత ఇదే మొదటిసారి. అయితే 1989లో కాంగ్రెస్ 178 స్థానాల్లో విజయం సాధించింది. 1994లో జనతాదళ్కు 115 స్థానాలు దక్కగా.. 1999లో కాంగ్రెస్ 132 సీట్లు గెలుచుకుంది. 2004, 2008 ఎన్నికల్లో హంగ్ ఏర్పడింది. 2013లో కాంగ్రెస్ 122 స్థానాలు దక్కించుకోగా.. 2018 ఎన్నికల్లో మళ్లీ హంగ్ వచ్చింది.
