Cab Driver Get 9000 Crore : ఓ క్యాబ్ డ్రైవర్ ఖాతాలో ఉన్నట్టుండి అక్షరాల రూ.9 వేల కోట్లు జమ అయ్యాయి. దీంతో ఎంతో సంతోషించిన అతడి ఆనందం ఎంతోసేపు నిలవలేదు. కలకలం రేపిన ఈ సంఘటన తమిళనాడులోని కొడంబక్కం ప్రాంతంలో వెలుగు చూసింది.
రూ.15లు ఉన్న ఖాతాలోకి రూ.9 వేల కోట్ల..
పళని నెయ్కారాపట్టికి చెందిన రాజ్కుమార్ కొడంబక్కం ప్రాంతంలో తన స్నేహితులతో కలిసి నివసిస్తున్నాడు. అక్కడే ఉంటూ స్థానికంగా కారును రెంట్కు తీసుకొని నడిపిస్తున్నాడు. ఈ క్రమంలో సెప్టెంబర్ 9న మధ్యాహ్నం 3 గంటల సమయంలో రాజ్కుమార్ కారులో నిద్రిస్తున్నాడు. ఈ సమయంలో అతడి ఫోన్కు తూత్తుకూడి జిల్లాలోని తమిళనాడు మెర్కంటైల్ బ్యాంక్ ప్రధాన కార్యాలయం నుంచి ఓ సందేశం వచ్చింది. అందులో రాజ్కుమార్ ఖాతాలోకి ఏకంగా రూ.9 వేల కోట్లు డిపాజిట్ అయినట్లుగా మెసేజ్ ఉంది. ఇది చూసిన రాజ్కుమార్కు ముందుగా ఏమీ అర్థం కాలేదు. కేవలం రూ.15లు ఉన్న తన బ్యాంకు ఖాతాలోకి ఒక్కసారిగా ఇంత పెద్ద మొత్తం ఎవరు జమ చేసి ఉంటారని అనుకున్నాడు. అనంతరం అది ఫేక్ లేదా సైబర్ నేరగాళ్లు పంపించిన సందేశం అని భావించాడు.
వాడుకున్న రూ.21 వేలను దాని కింద జమ!
అయితే ఆ మెసేజ్ నిజమో కాదో అని తెలుసుకునేందుకు.. తన స్నేహితుడికి అప్పుగా ఇవ్వాల్సిన రూ.21 వేలను అతడికి పంపించి చూశాడు. దీంతో ఆ లావాదేవీ సక్సెస్ఫుల్ కావడం వల్ల.. తన అకౌంట్లోకి వచ్చిన రూ.9వేల కోట్ల సందేశం నిజమే అని సంతోషించాడు. అయితే అతడి సంతోషం ఎంతోసేపు నిలవలేదు. ఎందుకంటే స్నేహితుడికి డబ్బులు పంపిన కొద్దిసేపటికే రాజ్కుమార్కు సంబంధిత బ్యాంకు నుంచి ఫోన్ కాల్ వచ్చింది. అందులో 'దయచేసి మీ బ్యాంక్ అకౌంట్లో డిపాజిట్ అయిన రూ.9 వేల కోట్ల సొమ్మును వాడకండి. అవి పొరపాటుని మీకు బదిలీ అయ్యాయి' అని బ్యాంక్ అధికారులు చెప్పారు. ఇది విన్న రాజ్కుమార్ ఒక్కసారిగా నిరాశ చెందాడు.
అనంతరం తనకు వచ్చిన డబ్బులో నుంచి రూ.21వేలను వాడుకున్నానని బ్యాంకు సిబ్బందికి తెలిపాడు. ఇది తెలుసుకున్న బ్యాంకు మేనేజ్మెంట్.. వినియోగించిన డబ్బును తిరిగి చెల్లించాల్సిందిగా రాజ్కుమార్ను కోరారు. లేదంటే చర్యలు తీసుకుంటామని అతడిని బెదిరించే ప్రయత్నం చేశారు. దీంతో వెంటనే రాజ్కుమార్ దగ్గర్లోని పోలీస్ స్టేషన్కు వెళ్లి సదరు బ్యాంకు నుంచి తనకు ప్రాణహాని ఉందంటూ ఫిర్యాదు చేశాడు. రాజ్కుమార్ కంప్లైంట్ మేరకు కేసు నమోదు చేసుకున్న పోలీసులు.. ఇరు వర్గాల న్యాయవాదులను పిలిపించి రాజీ కుదిరించారు. దీని ప్రకారం రాజ్కుమార్ వాడుకున్న రూ.21 వేలను వాహన లోన్ కింద బ్యాంకు జమ కడుతుందని బ్యాంకు తరఫు న్యాయవాదులు చెప్పడం వల్ల కథ సుఖాంతం అయింది. కాగా, ఈ సంఘటన స్థానికంగా కలకలం రేపింది.
