Boy killed by his friends: ఝార్ఘండ్లోని దేవఘర్ జిల్లాలో దారుణ ఘటన వెలుగు చూసింది. ఓ 14 ఏళ్ల బాలుడిని అతని స్నేహితులే అతికిరాతకంగా హత్య చేశారు. కాళ్లు, చేతులు నరికి మృతదేహాన్ని సంచుల్లో పెట్టి అటవీ ప్రాంతంలో పడేశారు.
మంగళవారం రాత్రి బాలుడు అదృశ్యమైనట్లు కుటుంబ సభ్యులు ఆ మరుసటి రోజున ఫిర్యాదు చేశారు. బాలుడి స్నేహితుడిని అదుపులోకి తీసుకుని విచారించగా విస్తుపోయే నిజాలు బయటకు వచ్చినట్లు సబ్ డివిజనల్ పోలీస్ అధికారి పవన్ కుమార్ తెలిపారు.
ఏం జరిగింది..?
జసిది పోలీస్ స్టేషన్ పరిధి, రోహిణి గ్రామంలోని తన నివాసంలో బాధితుడిని అతని స్నేహితుడు(14) మంగళవారం రాత్రి 8.30 గంటల ప్రాంతంలో కలిశాడు. ఇద్దరు కలిసి కుమ్రాబాద్ స్టేషన్ రోడ్కు వెళ్లారు. అక్కడ వారిని అవినాశ్(19)అనే మరో స్నేహితుడు కలిశాడు. ముగ్గురు కలిసి.. పలంగా పహాడ్ అటవీ ప్రాంతం వైపుగా వెళ్లారు. అక్కడే అవినాశ్కు, బాధితుడికి మధ్య గొడవ జరిగింది.
గొడవ జరుగుతున్న క్రమంలోనే అవినాశ్ తన వద్ద ఉన్న పదునైన కత్తిని తీసి బాధితుడిని పొడిచాడు. గొంతు కోసి హత్య చేశాడు. ఆ తర్వాత.. కాళ్లు, చేతులు నరికి.. శరీర భాగాలను మూడు సంచుల్లో పెట్టి అటవీ ప్రాంతంలో పడేశాడు.
మృతదేహాన్ని స్వాధీనం చేసుకున్న పోలీసులు.. అవినాశ్ను అరెస్ట్ చేశారు. నిందితుడు నేరం అంగీకరించినట్లు పోలీసులు చెప్పారు. రక్తంతో తడిసిన కత్తి, బాధితుడి మొబైల్ ఫోన్ సైతం స్వాధీనం చేసుకున్నట్లు తెలిపారు. భారతీయ శిక్షా స్మృతిలోని 302, 201, 120బీ, 34 సెక్షన్ల కింద కేసు నమోదు చేసినట్లు వెల్లడించారు.
ఇదీ చూడండి: పెళ్లి కాకుండానే తల్లైన యువతి.. బిడ్డ పుట్టగానే హత్య చేసి..
