'శ్రమ నీ ఆయుధం అయితే విజయం నీ బానిస అవుతుంది' అన్న వ్యాఖ్యాన్ని నిజం చేసింది ఓ దివ్యాంగురాలు. పక్కవారి సహాయం లేకపోతే కనీసం అడుగు కూడా వేయలేదు. కానీ తన పట్టుదల, సంకల్పంతో.. అక్షరాలను అందిపుచ్చుకుని ఎంతో ఎత్తుకు ఎదిగింది. అంగవైకల్యాన్ని అధిగమించిన ఆ అమ్మాయి.. జాతీయ అర్హత పరీక్ష(నెట్)లో 99.31 శాతం సాధించి అందర్నీ ఆశ్చర్యానికి గురిచేసింది.
బంగాల్ నదియాలోని శాంతిపుర్‌కు చెందిన పియాషా మహల్దార్ అనే అమ్మాయి పుట్టుకతోనే దివ్యాంగురాలు. కేవలం 3 అడుగుల పొడవు మాత్రమే ఉంటుంది. బాల్యం నుంచి తనంతట తానుగా కదలలేని పరిస్థితి. అయినా సరే పియాషాకు చదువంటే చాలా ఆసక్తి. అదే ఇప్పుడు ఆమెను ఈ విజయం సాధించేలా చేసింది. స్కూల్, కాలేజీలో కూడా మంచి మార్కులతో ఉత్తీర్ణత సాధించింది. సెప్టెంబర్ 23న యూజీసీ నిర్వహించిన జాతీయ అర్హతా పరీక్షను కళ్యాణి పరీక్షా కేంద్రంలో రాసింది. నెట్ పరీక్ష సైతం.. కంప్యూటర్ ముందు బోర్లా పడుకుని రాసింది. సోమవారం ఫలితాలు వెలవడగా.. బెంగాలీ విభాగంలో 99.31 శాతం స్కోర్ సాధించింది పియాషా.
"సెప్టెంబర్ 23న పరీక్ష జరగగా దాని ఫలితాలు సోమవారం వెలువడ్డాయి. నేను జూనియర్ రీసెర్చ్ ఫెలోషిప్నకు అర్హత సాధించినందుకు చాలా సంతోషంగా ఉంది. నాకు పీహెచ్డీ చేయాలని ఉంది. ఈ పర్సంటేజ్తో దేశంలోని ఏ యూనివర్సిటీలోనైనా తప్పకుండా సీటు వస్తుంది. ప్రస్తుతం అసిస్టెంట్ ప్రొఫెసర్ పోస్టులకు దరఖాస్తు చేసుకోగలుగుతున్నాను."
- పియాషా మహల్దార్, దివ్యాంగురాలు
పియాషా బెంగాలీ విభాగంలో అసిస్టెంట్ ప్రొఫెసర్గా మారడమే లక్ష్యంతో నెట్ పరీక్ష రాసింది. దాని కోసమే రాత్రింబవళ్లు కష్టపడి చదివింది. తన కష్టానికి తగిన ఫలితం దక్కింది. అయితే.. పియాషా సాధించిన స్కోరుతో దేశం ఎక్కడైనా పీహెచ్డీ చేయవచ్చు. కానీ తన అంగవైకల్యం కారణంగా ఇంటికి దగ్గరగా ఉన్న కళ్యాణి యూనివర్సిటీలోనే పీహెచ్డీ చేయాలని అనుకుంటున్నట్లు తెలిపింది. పియాషా సాధించిన విజయం పట్ల పలువురు ప్రశంసిస్తున్నారు.
