బంగాల్ మూడో దశ ఎన్నికల్లో భాజపా నేతలు తమ కార్యకర్తలు, అభ్యర్థులపై దాడులు జరుపుతున్నారని, పోలింగ్ కేంద్రాలను ఆక్రమిస్తున్నారని ఆరోపించారు టీఎంసీ అధినేత్రి మమతా బెనర్జీ. ఆరంబాగ్ నియోజకవర్గంలో పోలింగ్ కేంద్రానికి వచ్చిన తమ అభ్యర్థి, దళిత మహిళ సుజాత మొండల్పై వెంటపడి మరీ దాడి చేశారన్నారు. ఈ క్రమంలో ఆమె తలపై తీవ్ర గాయాలయ్యాయని పేర్కొన్నారు. ఖనాకుల్లోనూ తమ అభ్యర్థిపై దాడి జరిపారని తెలిపారు. అలిపుర్దౌర్ జిల్లాలో పర్యటన సందర్భంగా మంగళవారం ఈ వ్యాఖ్యలు చేశారు మమత.
"బంగాల్లో ఆశించినంత స్పందన రాకపోవడం వల్లే భాజపా ఈ విధంగా కుట్ర పన్నుతోంది. ఎన్నికలు ప్రారంభమైనప్పటి నుంచి ఇప్పటివరకు నలుగురు తృణమూల్ కాంగ్రెస్ కార్యకర్తలు హత్యకు గురయ్యారు. కానీ దీనిపై అధికారులు ఎలాంటి చర్యలు చేపట్టలేదు. మీరు మమ్మల్ని భయపెట్టలేరు. మేము ఇలాంటి ఘటనలకు బెదరం. "
-మమతా బెనర్జీ, బంగాల్ ముఖ్యమంత్రి
అభ్యర్థులను అడ్డుకుని..
తూర్పు క్యానింగ్లో తమ అభ్యర్థి షకౌత్ మోల్లాను పోలింగ్ కేంద్రానికి రానివ్వకుండా భద్రతా దళాలు అడ్డుకున్నాయని మమత ఆరోపించారు. రాష్ట్రవ్యాప్తంగా ఈ తరహా ఘటనలు చాలా జరుగుతున్నాయని, ఉదయం నుంచి ఇప్పటివరకు సుమారు 100కుపైగా ఫిర్యాదులు వచ్చాయని పేర్కొన్నారు. ఈ ఘటనలపై ఎన్నికల సంఘానికి ఫిర్యాదు చేశామని, అయినా ఎలాంటి ప్రయోజనం లేదని వ్యాఖ్యానించారు.
ఇదీ చదవండి : టీఎంసీ, భాజపా కార్యకర్తల మధ్య ఘర్షణ
