అది డిసెంబర్ 8, 2020. మహారాష్ట్ర- ప్రతాప్గఢ్లోని కుందా గ్రామానికి చెందిన ఆర్తి మౌర్య ఇల్లు అందంగా ముస్తాబైంది. కొన్ని గంటల్లో పెళ్లికొడుకు బారాత్తో ఆ ఇంటికి రానున్నాడు. అతిథులను సాదరంగా ఆహ్వానించేందుకు ఏర్పాట్లు జరుగుతున్నాయి. కానీ.. ఒక్కసారిగా మొత్తం తలకిందులైంది. అప్పటివరకూ ఇంట్లో నెలకొన్న సందడి హఠాత్తుగా మాయమై, విషాద వాతావరణం కమ్మేసింది.
"మేడ మీద ఓ పిల్లాడు పరిగెడుతున్నాడు. ఆర్తి పిలుస్తున్నా వినిపించుకోకుండా పరిగెడుతూనే ఉన్నాడు. ఆ పిల్లాణ్ని పట్టుకునేందుకు ప్రయత్నించిన ఆర్తి జారిపడిందో, లేదా టెంట్ స్తంభమో కూలిందో తెలీదు కానీ.. నా బిడ్డ కిందపడిపోయింది. ఆ సమయంలో నలుగురు చిన్నపిల్లలు తప్ప పైన ఎవరూ లేరు."
- ఆర్తి తండ్రి
నవ వధువుగా తయారై.. ఆపై స్ట్రెచర్పై..
అందంగా ముస్తాబై, నవ వధువుగా అత్తారింటికి వెళ్లాల్సిన ఆర్తి.. స్ట్రెచర్పై పడుకుంది. ఆనందంతో వెలిగిపోయిన ఆమె కుటుంబసభ్యుల ముఖాలు ఆ ఊహించని ఘటనతో పేలవంగా మారిపోయాయి.
"మాకిది పెద్ద షాక్. పెళ్లి మళ్లీ అవుతుందో లేదో నమ్మకం లేదు."
- ఆర్తి సోదరి
వెన్నెముక విరిగి, ఒళ్లంతా గాయాలు..
ఇంకో 8 గంటల్లో పెళ్లి అనగా.. జరిగిన ప్రమాదం ఆర్తి కుటుంబ సభ్యులను, బంధువులను దిక్కుతోచని స్థితిలోకి నెట్టేసింది. ఆరతి కాలు జారి మేడమీద నుంచి పడిపోయింది. ఆమె వెన్నెముక విరగడం సహా.. ఒళ్లంతా తీవ్రగాయాలయ్యాయి. అంతటి విషమ పరిస్థితిలో ఉన్న ఆర్తికి వైద్యం చేసే సదుపాయాలు లేక, దగ్గర్లోని ఆసుపత్రులన్నీ చేర్చుకునేందుకు నిరాకరించాయి. చివరకు ప్రయాగ్రాజ్లోని ఓ ప్రైవేటు ఆసుపత్రిలో ఆర్తిని చేర్చిపించారు.
"తన శరీరం పైభాగం మొత్తం బాగానే ఉన్నా.. నడుము కింది భాగానికి రక్తసరఫరా జరగడం ఆగి పోయిందని వైద్యులు చెప్తున్నారు. ఆమెను పీజీఐకి తీసుకెళ్లాం. కానీ.. అక్కడ క్యూలో నిలబడాల్సి వచ్చింది. న్యూరో సర్జన్ సచిన్ సింగ్ వైద్యం చేస్తున్నారు. పీజీఐకి తీసుకెళ్లడంలో అధికారుల నుంచి, స్థానిక ఎంపీ నుంచి మాకు సహకారం అందుతోంది. ఇంకా అక్కడికి వెళ్లాలి."
- ఆర్తి తండ్రి
మంచానికే పరిమితం..
ఆర్తి ఆరోగ్య పరిస్థితి పరీక్షించిన తర్వాత.. కొన్ని నెలల పాటు ఆమె మంచానికే పరిమితం అవుతుందని కుటుంబ సభ్యులకు చెప్పారు వైద్యులు. ఇదంతా జరిగిన తర్వాత తమ బిడ్డను పెళ్లి చేసుకునేందుకు పెళ్లికొడుకు తరపువారు ఒప్పుకోరనే అనుకున్నారు ఆరతి తల్లిదండ్రులు.
"మా అక్కను తప్ప ఇంకెవరినీ పెళ్లి చేసుకోనని పెళ్లికొడుకు చెప్పడం మాకు చెప్పలేని ఆనందం కలిగించింది."
- ఆర్తి సోదరి
ఆ మాటతో వెల్లువిరిసిన ఆనందం..
తమ కుమార్తెకు ప్రమాదం జరిగిందని పెళ్లికొడుకు కుటుంబ సభ్యులకు చెప్తే.. అయినా ఆర్తినే పెళ్లి చేసుకుంటానని అవ్ధేష్ అనడంతో ఆనందం, ఆశ్చర్యం ఒకేసారి కలిగింది ఆర్తి తల్లిదండ్రులకు.
"ప్రేమకు మించి ఇందుకు వేరే కారణమేమీ లేదు. విధి నాకు అందించిందే నాకు దక్కింది. నాకేం సమస్య లేదు. ఆర్తికి ఇలా జరిగినందున ఆమె చెల్లిని వివాహం చేసుకోమన్నారు. కానీ నేనందుకు ఒప్పుకోలేదు. ఆర్తిని మాత్రమే భార్యగా చేసుకుంటానన్నాను."
- అవ్ధేష్, ఆర్తి భర్త
చెమర్చిన ఆ కుటుంబం కళ్లు..
పెళ్లికి ముందు ఆర్తి అంతలా గాయపడ్డా, తనను భార్యగా చేసుకునేందుకు తనకు ఎలాంటి అభ్యంతరం లేదని అవ్ధేష్ చెప్పాడు. ఆయన నిర్ణయం విన్న ఆర్తి కుటుంబ సభ్యుల కళ్లు చెమర్చాయి. వైద్యుల అనుమతితో ఆర్తిని ఇంటికి తీసుకువచ్చారు. శరీరంలోకి ద్రవాలు ఎక్కించే పైపులు సహా.. ఆక్సీజన్ సరఫరాపై ఉండగానే ఆమె నుదుటన సిందూరం దిద్దాడు అవ్ధేష్. ఆ వేడుక తిలకించిన వారందరి కళ్లలో కన్నీళ్లు తిరిగాయి. పెళ్లి తర్వాత సాధారణంగా అమ్మాయిలు అంతా అత్తారింటికి వెళ్లే సమయంలో.. నవ వధువు ఆర్తి మాత్రం మళ్లీ ఆసుపత్రికి తిరిగి వెళ్లింది.
"నాకు ప్రమాదం జరిగిన తర్వాత మా అత్తామామల నిర్ణయం గురించి నాకు చెప్పారు. అన్ని ఏర్పాట్లూ చేశారు. నేనే పరిస్థితిలో ఉన్నా.. ఊరేగింపుతో వచ్చి, నన్ను పెళ్లి చేసుకుంటానని నా భర్త చెప్పాడు."
- ఆర్తి, పెళ్లికూతురు
పెళ్లి తర్వాతి రోజే ఆర్తికి శస్త్రచికిత్స నిర్వహించారు. ఆ ఆపరేషన్కు సంబంధించిన ఒప్పంద పత్రంపై ఆమె భర్త అవ్ధేష్ సంతకం చేశాడు.
"వెన్నెముకను సరిచేశాం. రక్తనాళాలపై ఒత్తిడి తగ్గించేందుకు స్క్రూలు బిగించాం. రక్తనాళాల చుట్టూ ఉండే పొర కూడా సరిచేశాం. అయినా ఆర్తి కోలుకునేందుకు సమయం పడుతుంది."
- వైద్యుడు
వెన్నెంటే ఉంటూ..
ఆర్తి కోలుకుంటే, నడుచుకుంటూ అత్తారింటికి వెళ్లే రోజు కోసం అంతా ఎదురు చూస్తున్నారు. అవ్ధేష్ ఆమెకు పూర్తి సహకారమందిస్తూ, ధైర్యం కోల్పోకుండా చూసుకుంటున్నాడు.
"నా బిడ్డ త్వరగా కోలుకోవాలని భగవంతుడిని ప్రార్థిస్తున్నాం. కోలుకున్నాక ఆమెను అత్తారింటికి పంపుతాం."
- ఆర్తి తండ్రి
ఇదీ చదవండి: ఒకేసారి 3 మతాల కీర్తనలు- సోదరభావానికి ప్రతీకలు!
