ఎలాంటి జాతీయ, అంతర్జాతీయ ప్రయాణాలు చేయకపోయినా, కరోనా బాధితులతో సంబంధం లేకపోయినా.. మహమ్మారి బారినపడుతున్న కేసులు వెలుగుచూస్తుండడం దేశంలో తీవ్ర ఆందోళన సృష్టిస్తోంది. అకస్మాత్తుగా తీవ్ర శ్వాస సంబంధ అనారోగ్యాని(సివియర్‌ అక్యూట్‌ రెస్పిరేటరీ ఇల్‌నెస్‌- ‘సారీ’)కి గురవుతున్న వారిలో పలువురు కరోనా బారినపడుతున్నారు. ఇలాంటి 100 మందిలో కనీసం 39 శాతం మందికి ఎలాంటి ప్రయాణ నేపథ్యంకానీ, వైరస్ బాధితుల్ని కలిసిన సందర్భం కానీ లేదు. ఈ తరహా కేసులు ఎక్కువగా ఉన్న 15 రాష్ట్రాల్లోని 36 జిల్లాల్లో వ్యాధి నివారణకు మరిన్ని చర్యలు చేపట్టాల్సిన ఆవశ్యకతను భారతీయ వైద్య పరిశోధన మండలి(ఐసీఎంఆర్‌) నొక్కిచెప్పింది.
ఇలా వెల్లడైంది...
ఫిబ్రవరి 15 నుంచి ఏప్రిల్‌ 2 వరకు దేశంలోని 21 రాష్ట్రాల్లోని 52 జిల్లాల్లో అకస్మాత్తుగా ‘సారీ’కి గురైన 5,911 మంది రోగులకు కరోనా పరీక్షలు నిర్వహించారు. వీరిలో 104 (1.8%) మంది కరోనా బారినపడినట్లు వెల్లడైంది. బాధితుల్లో 40 మంది (39.2%)కి ఎలాంటి దేశ, విదేశ ప్రయాణం, కరోనా బాధితుల్ని కలిసిన నేపథ్యం లేదు. ఇద్దరు(2%) తమకు కరోనా పాజిటివ్ ఉన్న కేసులతో సంబంధం ఉన్నట్లు తెలిపారు. ఒకరు(1%) ఇటీవల విదేశీయానం చేసినట్లు చెప్పారు. 59(57.8%) మందికి అది ఎలా సోకిందన్న సమాచారం(ఎక్స్‌పోజర్‌ హిస్టరీ) లేదు. ఐసీఎంఆర్‌ రూపొందించిన ఈ పరిశోధన పత్రం.. భారతీయ వైద్య పరిశోధన జర్నల్‌లో తాజాగా ప్రచురితమైంది.
- సారీ రోగుల్లో పాజిటివ్ కేసుల సంఖ్య మార్చి 14కి ముందు 0% ఉండగా, ఏప్రిల్‌ 2 నాటికి అది 2.6%కి చేరింది.
- ఆంధ్రప్రదేశ్‌లో 2 జిల్లాల్లో 129 మందికి, తెలంగాణలో 2 జిల్లాల్లో 190 మందికి ఈ పరీక్షలు నిర్వహించగా.. ఏపీలో నలుగురు (3.1%), తెలంగాణలో 8 మంది(4.2%)లో కరోనా నిర్ధారణ అయింది. పరీక్షించిన వారిలో అత్యధిక నిష్పత్తిలో పాజిటివ్‌గా తేలినవారు తెలంగాణ రాష్ట్రంలో ఉన్నారు. అయితే ఐసీఎంఆర్‌ అధిక జాగ్రత్తలు సూచించిన 36 జిల్లాల్లో ఏపీ, తెలంగాణ జిల్లాలు ఉన్నాయా? లేవా? అనేది వెల్లడి కాలేదు.
- ఈ పరీక్షలు అత్యధికంగా గుజరాత్‌ రాష్ట్రంలో 792 మందికి, తమిళనాడులో 577 మందికి, మహారాష్ట్రలో 553 మందికి నిర్వహించారు. తెలంగాణ తర్వాత మహారాష్ట్రలో అత్యధికంగా 3.8% మంది ‘సారీ’ బాధితుల్లో కరోనా నిర్ధారణ అయింది.
