Congress in UP: ఐదు రాష్ట్రాల ఎన్నికల్లో తమ సత్తా చూపి అన్ని రాష్ట్రాల్లో అధికారంలోకి వస్తామని చెప్పిన కాంగ్రెస్ కనీస పోటీ ఇవ్వలేకపోయింది. ఉత్తర్ప్రదేశ్ ఎన్నికలను ప్రతిష్టాత్మకంగా తీసుకున్న కాంగ్రెస్ ప్రధాన కార్యదర్శి ప్రియాంక గాంధీ.. కాళ్లకు చక్రాలు కట్టుకుని రాష్ట్రం మొత్తం తిరిగారు. అయినా ఏ మాత్రం ప్రభావం చూపలేకపోయారు. ముఖ్యంగా మహిళా ఓటర్లపై దృష్టిసారించినా.. అంచనాలను అందుకోలేకపోయింది హస్తం పార్టీ. రైతు పోరాటాల నుంచి మహిళలపై దాడులు, లఖింపుర్ ఖేరీ హింస వంటి అంశాలను లేవనెత్తుతూ ఓటర్లను ఆకర్షించే ప్రయత్నం చేసినా ఫలితం లేకపోయింది.
రాష్ట్రంలో అధికారమే లక్ష్యంగా మొత్తం 403 స్థానాల్లో అభ్యర్థులను నిలిపింది కాంగ్రెస్. అదే స్థాయిలో ప్రచారమూ నిర్వహించింది. కానీ, ఓట్ల లెక్కింపులో డీలాపడిపోయింది. సింగిల్ డిజిట్కే పరిమితమైంది.
పంజాబ్లో కాంగ్రెస్ను ముంచిన అంతర్గత కుమ్ములాట
Congress in Punjab: 2017లో జరిగిన అసెంబ్లీ ఎన్నికల్లో మెజారిటీ స్థానాలు సాధించి అధికారాన్ని చేపట్టిన కాంగ్రెస్లో మొదటి నుంచే నేతల మధ్య విబేధాలు మొదలయ్యాయి. అప్పటి ముఖ్యమంత్రి కెప్టెన్ అమరీందర్ సింగ్, ప్రస్తుత పీసీసీ అధ్యక్షుడు నవజ్యోత్ సింగ్ సిద్ధూ మధ్య ప్రచ్ఛన యుద్ధమే నడిచింది. కొన్ని సందర్భాల్లో కెప్టెన్పై బహిరంగంగానే సంచలన వ్యాఖ్యలు చేశారు సిద్ధూ. అంతర్గత కలహాలు చిలికి చిలికి గాలివానగా మారి కెప్టెన్ వేరుకుంపటి పెట్టేందుకు దారితీశాయి. ఇప్పుడు అదే కాంగ్రెస్ కొంప ముంచినట్లు స్పష్టమవుతోంది.
ముఖ్యమంత్రి అభ్యర్థిగా చరణ్జీత్ సింగ్ చన్నీని ప్రకటించి.. బలహీన వర్గాల ఓట్లను ఒడిసిపట్టాలన్న కాంగ్రెస్ వ్యూహం బెడిసికొట్టింది. వెరసి రాష్ట్రంలో అధికారాన్ని కోల్పోయే స్థితికి చేరింది కాంగ్రెస్.
ఉత్తరాఖండ్లో రెండోస్థానానికే..
Congress in Uttarakhand: ఉత్తరాఖండ్ ఎన్నికల్లో భాజపాను గద్దె దించి అధికారం చేజిక్కించుకుంటామన్న కాంగ్రెస్ కల.. కలగానే మిగిలింది. భాజపా జోరుతో మరోమారు ప్రతిపక్షానికే పరిమితమైంది. మొత్తం 70 స్థానాల్లో మెజారిటీకి కావాల్సిన స్థానాల్లో భాజపా దూకుడు ప్రదర్శించగా.. కాంగ్రెస్ రెండో స్థానంలోనే ఉండిపోయింది.
రాష్ట్రంలో ప్రచార జోరు పెంచినప్పటికీ.. పార్టీలో అంతర్గత కలహాలు, అధిష్ఠానం తీరుపై మాజీ ముఖ్యమంత్రి హరీశ్ రావత్ అసంతృప్తి వ్యక్తం చేయటం వంటి అంశాలు కాంగ్రెస్ను దెబ్బతీసినట్లు విశ్లేషకులు భావిస్తున్నారు. ముఖ్యమంత్రి అభ్యర్థిని ప్రకటించకుండానే.. హరీశ్ రావత్ నేతృత్వంలో ఎన్నికలకు వెళ్లిన కాంగ్రెస్ బొక్కబోర్లా పడింది.
మణిపుర్లోనూ..
Congress in Manipur: మణిపుర్లోనూ కాంగ్రెస్ చతికిలపడిపోయింది. అధికార భాజపాను ఢీకొట్టటంలో విఫలమై రెండో స్థానానికే పరిమితమైంది. 60 స్థానాల అసెంబ్లీలో మెజారిటీకి కావాల్సిన సీట్లను అందుకోలేకపోయింది. మరోమారు భాజపాకే అధికారం దక్కే అవకాశాలు మెండుగా కనిపిస్తున్నాయి.
గోవాలో నిలిచేనా?
Congress in Goa: ఉత్తర్ప్రదేశ్, ఉత్తరాఖండ్, మణిపుర్, పంజాబ్ రాష్ట్రాల్లో చతికిలపడిన కాంగ్రెస్.. గోవాలో భాజపాతో పోటీపడింది. నువ్వానేనా అన్నట్లు కనిపించింది. అయితే, అధికారం చేపట్టేందుకు కావాల్సిన మెజారిటీ స్థానాలను సాధించటంలో వెనకపడిపోయింది. 2017లో జరిగిన ఎన్నికల్లో త్రుటిలో అధికారాన్ని కోల్పోయిన కాంగ్రెస్.. మరోమారు ప్రతిపక్షంలోనే కూర్చొనే అవకాశం ఉంది.
మహారాష్ట్రవాది గోమంతక్ పార్టీ(ఎంజీపీ) మద్దతుతో అధికార భాజపా హ్యాట్రిక్ కొట్టడం ఖాయంగా కనిపిస్తోంది.
దిల్లీలో కాంగ్రెస్ శ్రేణుల నిరసన..
ఐదు రాష్ట్రాల అసెంబ్లీ ఎన్నికల ఓట్ల లెక్కింపులో వెనుకంజలో ఉంది కాంగ్రెస్. అధికారంలో ఉన్న పంజాబ్లో సైతం వెనకబడిపోయింది. దీంతో ఈవీఎం ట్యాంపరింగ్ ఆరోపణలు చేస్తూ దిల్లీలోని పార్టీ కార్యాలయం వద్ద ఆందోళనకు దిగారు కాంగ్రెస్ కార్యకర్తలు.
ఇదీ చూడండి: ఉత్తరాఖండ్, మణిపుర్లో భాజపా జోరు.. గోవాలో హోరాహోరీ
