సీఎం జగన్ మాటల్లో ప్రగల్బాలు చేతల్లో శూన్యం, కౌలు రైతులకు వైఎస్సార్సీపీ ప్రభుత్వంలో కన్నీళ్లే!

Tenant Farmers Problems in YSRCP Government : రాష్ట్రంలో కౌలు రైతుల పరిస్థితి దయనీయంగా మారింది. గతంలో రుణ అర్హత కార్డులతో పాటు, మండల వ్యవసాయ అధికారులు కూడా భూ యజమాని అంగీకారంతో పని లేకుండా సీఓసీ కార్డులు (COC Cards) ఇచ్చేవారు. వాటి ఆధారంగానే రైతులకు లక్ష వరకు హామీ లేని పంట రుణాలు ఇచ్చారు. భూ యజమానుల పట్టాదారు పాసు పుస్తకంతో కౌలు రైతుల వేలిముద్రపై విత్తనాలు ఇచ్చేవారు. రాయితీ పథకాలు (Subsidy Schemes to Farmers) కూడా అందేవి. కౌలు రైతులకు పంటరుణాల విషయంలో బహుళ ప్రయోజన విస్తరణాధికారులు చొరవ తీసుకునేవారు. అందుకే అప్పట్లో కౌలు రైతులకు పంట రుణాలు ఏడాదికి 3 వేల కోట్ల నుంచి 4 వేల కోట్లకు పైగా దక్కాయి. మండల వ్యవసాయ అధికారి ఇచ్చే కార్డు ఉంటే రాయితీ విత్తనాలు కూడా ఇచ్చేవారు.

CM Jagan Cheating Tenant Farmers : వైఎస్సార్సీపీ పాలనలో కౌలు రైతులకు కార్డుల (Cards for Tenant Farmers) జారీలోనూ అలవిమాలిన జాప్యం జరుగుతోంది. ఖరీఫ్‌ ఆరంభంలోనే కౌలుదారుల్ని గుర్తించి వెంటనే కార్డులు ఇవ్వడం ప్రారంభించాలి. కానీ అధికారులు జూన్, జులైలో కార్డుల జారీ మొదలుపెట్టి తూతూమంత్రంగా సెప్టెంబరు వరకు కొనసాగించారు. కార్డులు చేతికి వచ్చే సమయానికి పంట పెట్టుబడి కోసం ప్రైవేటు వ్యాపారుల వద్ద రైతులు అప్పు తెచ్చుకుంటున్నారు. భూయజమాని అంగీకారం లేకపోవడంతో ఈ-క్రాప్‌లోనూ కౌలు రైతుల పేర్లు నమోదు కావడం లేదు. దీంతో పంటలు దెబ్బతిన్నప్పుడు పెట్టుబడి రాయితీ, పంటల బీమా కూడా అందుకోలేకపోతున్నారు. సాగుదారు హక్కు కార్డులు లేక కౌలుదార్లకు పెట్టుబడి రాయితీ దక్కడం లేదు.

Farmers Suicides in AP : రాష్ట్రంలో గత నాలుగేళ్లలో 1,965 కోట్ల పెట్టుబడి రాయితీ ఇచ్చారు. ఇందులో 300 కోట్లు కూడా కౌలు రైతులకు దక్కలేదు. 2019 - 20లో 6వేల 331 మంది, 2020 - 21లో లక్షా 38 వేల మంది, 2021 - 22లో 69వేల మందికే పెట్టుబడి రాయితీ జమైంది. పంట నష్టానికి ఇచ్చే బీమా కూడా కనీసం 5 శాతం మంది కౌలు రైతులకూ దక్కడం లేదు. 6వేల 684 కోట్ల పంటల బీమా ఇచ్చామంటున్న సర్కారు అందులో కౌలు రైతులకు 600 కోట్లు కూడా ఇవ్వలేదు. ఆత్మహత్య చేసుకున్న కౌలు రైతుల కుటుంబాలకు ఆర్థిక సాయం మాటలకే పరిమితమైంది. కార్డులు లేవంటూ పరిహారం తిరస్కరిస్తున్నారు.

Crop Loans to Tenant Farmers in Andhra Pradesh : పంట రుణాల్లోనూ కౌలు రైతుల వాటా శూన్యమే. 2018 – 19లో 4 వేల 266 కోట్ల పంట రుణాలు ఇవ్వగా వైఎస్సార్సీపీ వచ్చాక అది కాస్త తగ్గిపోయింది. గతేడాది కేవలం 15 వందల 66 కోట్లు మాత్రమే కౌలు రైతులకు పంట రుణాలు అందాయి. అంటే వంద శాతం ప్రైవేటు పెట్టుబడులపైనే రైతులు ఆధారపడాల్సిన నిస్సహాయ స్థితి.