WTC FINAL 2023 India Squad Ishan Kishan : గాయం కారణంగా ఐపీఎల్, వరల్డ్ టెస్ట్ ఛాంపియన్ షిప్ ఫైనల్ జట్టునుంచి స్వయంగా వైదొలిగాడు టీమ్ఇండియా స్టార్ బ్యాటర్ కేఎల్ రాహుల్. దీంతో డబ్ల్యూటీసీ జట్టులో ఖాళీ ఏర్పడింది. దీంతో కేఎల్ రాహుల్ స్థానంలో మరో ప్లేయర్ను బీసీసీఐ సెలెక్షన్ కమిటీ ఎంపిక చేసింది. ఆ ప్లేస్లో ఇషాన్ కిషన్ను జట్టులోకి తీసుకుంది. ఇక స్టాండ్బై ప్లేయర్లుగా రుతురాజ్ గైక్వాడ్, ముకేశ్ కుమార్, సూర్యకుమార్ యాదవ్ ఉన్నారు. ఇటీవల ఆస్ట్రేలియాతో జరిగిన బోర్డర్‌- గావస్కర్‌ ట్రోఫీలో టీమ్ఇండియా విజయం సాధించింది. దీంతో డబ్లుటీసీ ఫైనల్ బెర్తును ఖరారు చేసుకుంది. ఈ ఫైనల్ మ్యాచ్ ఇంగ్లాండ్ వేదికగా జూన్ 7 నుంచి 11 వరకు జరగనుంది.
ఐపీఎల్ 16 సీజన్లో భాగంగా రాయల్‌ ఛాలెంజర్స్‌ బెంగళూరు జట్టుతో జరిగిన మ్యాచ్‌లో లఖ్నవూ సూపర్ జెయింట్స్ సారథి కేఎల్ రాహుల్ గాయపడ్డాడు. అతడి కుడి తొడ పైభాగంలో గాయం అయింది. దీంతో అతడే స్వయంగా ఐపీఎల్ నుంచి, డబ్ల్యూటీసీ ఫైనల్ జట్టు నుంచి తప్పుకున్నాడు. అయితే, రాహుల్ స్థానంలో టీమ్ఇండియా తరఫున ఒక్క టెస్ట్ మ్యాచ్ కూడా ఆడని.. ఇషాన్కు బీసీసీఐ ఎంపిక చేయడం విశేషం.
కాగా, జయదేవ్ ఉనద్కత్కు గాయం అయింది. ఈ కారణంగా ప్రస్తుతం అతడు నేషనల్ క్రికెట్‌ అకాడమీలో చికిత్స పొందుతున్నట్లు బీసీసీఐ వెల్లడించింది. ఉనద్కత్ గాయం తీవ్రతపై పూర్తిగా స్పష్టత వచ్చిన తర్వాతే.. అతడు డబ్ల్యూటీసీ ఫైనల్ టీమ్లో కొనసాగే అంశంపై క్లారిటీ వస్తుందని తెలిపింది. దాంతో పాటు మరో బౌలర్ ఉమేశ్ యాదవ్ కూడా కేకేఆర్‌ మెడికల్ టీమ్ పర్యవేక్షణలో కోలుకుంటున్నాడని తెలిపింది. వారి దగ్గరి నుంచి తమ మెడికల్ టీమ్ ఎప్పటికప్పుడు వివరాలు అడిగి తెలుసుకుంటోందని పేర్కొంది. మరో ప్లేయర్ శ్రేయస్‌ అయ్యర్‌ వెన్ను నొప్పి కారణంగా జట్టుకు దూరమయ్యాడు.
డబ్ల్యూటీసీ ఫైనల్‌కు భారత జట్టు: రోహిత్ శర్మ (కెప్టెన్), శుభ్‌మన్ గిల్, ఛెతేశ్వర్ పుజారా, విరాట్ కోహ్లీ, అజింక్యా రహానే, కేఎస్ భరత్ (వికెట్ కీపర్), రవిచంద్రన్ అశ్విన్, రవీంద్ర జడేజా, అక్షర్ పటేల్, శార్దూల్ ఠాకూర్, మహ్మద్ షమీ, మొహమ్మద్ సిరాజ్, ఉమేశ్ యాదవ్, జయదేవ్ ఉనద్కత్, ఇషాన్ కిషన్ (వికెట్ కీపర్).
