అమ్మాయిలు అదరగొట్టారు.. చరిత్ర సృష్టించారు.. తొలి కళను ముద్దాడారు.. తాజాగా ఏ క్రికెట్ అభిమాని నోరు తెరచినా పలికే మాటలివే అంటే అతిశయోక్తి కాదు. అంతగా వారి పేరు మార్మోగిపోతోంది. అండర్-19 వరల్డ్కప్ ఫైనల్లో ఇంగ్లాండ్పై ఘన విజయం సాధించి చరిత్ర లిఖించారీ అమ్మాయిలు. ఏ ప్లేయర్ను కదిలించినా.. వారు అనుభవించిన కష్టాల కన్నీళ్లకు.. ఈ గెలుపు ఆనంద బాష్పాలు సమాధానాలని చెబుతున్నారు. ఇప్పుడు దేశం వారివైపు చూస్తోంది. వారి వీర గాథలను వింటోంది. ఆ ప్లేయర్లలో ఓ ఆణిముత్యమే ఈ తెలుగు తేజం గొంగడి త్రిష. అయితే త్రిష సక్సెస్ వెనుక ఆమె తండ్రి కష్టం ఎంతో ఉంది. కుమార్తె కెరీర్ కోసం తన జీవనోపాధిని కూడా త్యాగం చేశాడు. ఇదే నాన్న దిద్దిన తెలుగు తేజం త్రిష గాథ..
కార్టూన్ల బదులు.. క్రికెట్ చూశా..
తెలుగు నేల గర్వించ దగ్గ ప్లేయర్గా ఎదిగిన గొంగడి త్రిషది సాధారణ నేపథ్యమే. తెలంగాణలోని భద్రాచలం ఆమె స్వస్థలం. తండ్రి గొంగడి రెడ్డి. త్రిషకు చిన్నప్పటి నుంచే క్రికెట్పై అభిమానం ఏర్పడింది. సాధారణంగా చిన్న పిల్లలు టీవీలో వచ్చే కార్టున్లు ఎక్కువగా చూస్తారు. కానీ ఏడేళ్ల వయసు నుంచే త్రిష కార్టూన్లకు బదులు.. క్రికెట్ చూసేదట. అలా క్రికెట్ను కెరీర్గా ఎంచుకుంది. కానీ, ఈ సక్సెస్ వెనుక.. త్రిష ఆసక్తి మాత్రమే కాదు.. ఆమె తండ్రి సంకల్పం కూడా ఇంది. కుమార్తె భవిష్యత్ కోసం ఆయన తన జీవన ఆధారాన్నే త్యాగం చేశాడు.
నా జీవన ఆధారాన్ని అమ్ముకున్నా..
కుమార్తె కోసం తన జీవన ఆధారాన్నే అమ్మేశాడు త్రిష తండ్రి రెడ్డి. తనకున్న జిమ్ను నష్టానికి తన బంధువలకే అమ్ముకున్నాడు. అనంతరం మరో జిమ్లో ఫిట్నెస్ ట్రైనర్గా జాయిన్ అయ్యాడు. కుమార్తె భవిష్యత్ కోసం అది కూడా వదులుకున్నాడు. అనంతరం కుమార్తెను ఎలాగైనా క్రికెటర్ను చేయాలని కుటుంబంతో సహా సికింద్రాబాద్కు షిఫ్ట్ అయ్యాడు. అక్కడైతే క్రికెట్ ట్రైనింగ్కు అన్ని సౌకర్యాలను ఉంటాయని భావించాడు. 2012లో తన కుమార్తె నెట్స్లో ప్రాక్టీసు చేస్తున్న వీడియోను.. సేయింట్ జాన్ అకాడమీలోని కోచ్లు జాన్ మనోజ్, శ్రీనివాస్కు చూపించాడు. కాగా, త్రిష బ్యాటింగ్ స్పీడ్కు.. ఆమె కళ్లు, చేతులకు ఉన్న కోఆర్డినేషన్కు ఇంప్రెస్ అయ్యి ఆమెకు ట్రైనింగ్ ఇచ్చారు. ఈ మేరకు ఓ మీడియా సంస్థకు ఇచ్చిన ఇంటర్వ్యూలో కోచ్ మనోచ్ చెప్పాడు. ఇక, తన కుమార్తె వరల్డ్ కప్ సాధించిన సందర్భంగా మాట్లాడుతూ.. ' నేను కుమార్తె క్రికెట్ ట్రైనింగ్ కోసం నాలుగు ఎకరాలు భూమి అమ్మాను. భారత్ వరల్డ్కప్ గెలవడం ఆమె కల. అలాంటి ఆమె కలల్ని నేరవేర్చడానికి ఏం కోల్పోడానికైనా సిద్ధమే' అని చెప్పారు రెడ్డి.
త్రిష ఫ్యామిలీ సికింద్రాబద్కు షిఫ్ట్ అయిన తర్వాత.. 2014-15 ఇంటర్ స్టేట్ టోర్నీలో మొదటిసారి అండర్-16 జట్టులో ఆడింది. అనంతరం స్టేట్ తరఫున అండర్-16, అండర్-19 టోర్నీలకు ఆడింది. ఆ తర్వాత అండర్-19 ఛాలెంజర్ ట్రోఫీలో ఛాన్స్ సంపాదించింది.
ఆదివారం జరిగిన అండర్-19 వరల్డ్ కప్లో ఫైనల్లో త్రిష మంచి ప్రదర్శన చేసింది. మూడో వికెట్కు సౌమ్య తివారీతో కలిసి 46 పరుగులు జోడించింది. దీంతో ఇంగ్లాండ్ నిర్దేశించిన 69 పరుగుల లక్ష్యాన్ని టీమ్ఇండియా ఛేదించడంలో కీలక పాత్ర పోషించింది.
