Pujara Test Career : శివ్సుందర్ దాస్ నేతృత్వంలోని నలుగురు సభ్యులతో కూడిన సెలెక్షన్ కమిటీ శుక్రవారం.. వెస్టిండీస్ పర్యటనకు టీమ్ఇండియా టెస్టు జట్టును ప్రకటించిది. అయితే జట్టులో సీనియర్ ప్లేయర్ పుజారాకు సెలెక్షర్లు మొండి చేయి చూపారు. యశస్వీ జైస్వాల్, రుతురాజ్ గైక్వాడ్ లాంటి యువ ఆటగాళ్లను జట్టులోకి తీసుకున్నారు. కాగా డబ్ల్యూటీసీ 2023-25 దృష్టిలో ఉంచుకొని సెలెక్షన్ కమిటీ.. జట్టులో పలు కీలక మార్పులు చేసినట్లు తెలుస్తోంది. ఈ క్రమంలో ఇక పుజారా టెస్టు కెరీర్కు శుభం కార్డు పడినట్లేనా అన్న అనుమానాలు వ్యక్తమవుతున్నాయి. అయితే గతంలో స్వదేశంలో శ్రీలంకతో జరిగిన సిరీస్లో కూడా పుజారాతో పాటు రహానేను కూడా జట్టు నుంచి తొలగించారు. కాగా ప్రస్తుతం రహానేను జట్టులో ఎంపిక చేసి అతడికి వైస్కెప్టెన్గా ప్రమోషన్ కూడా ఇచ్చారు సెలెక్టర్లు.
పుజారా టెస్టు కెరీర్ ముగిసినట్టేనా..?
భారత్కు టెస్టు మ్యాచ్లు అనగానే గుర్తుకొచ్చే పేరు ఛెతేశ్వర్ పుజారా. అతడు క్రీజులో ఉంటే జట్టు గెలుస్తుందన్న ఓ నమ్మకం. అతడి ఆటతీరుతో టీమ్ఇండియా 'నయావాల్'గా కూడా పేరు తెచ్చుకున్నాడు. ద్రవిడ్ రిటైరయ్యాక.. చాలా కాలానికి పుజారా రూపంలో టీమ్ఇండియాకు ఓ నిలకడ ఉన్న ఆటగాడు దొరికాడని మాజీ క్రికెటర్లు ఎందరో ఆతడిని ప్రశంసించారు. కానీ గత కొద్దిరోజుల నుంచి పుజారా మైదానంలో పరుగులు సాధించేందుకు ఇబ్బంది పడుతున్నాడు. ఈ క్రమంలో అతడిని మరోసారి జట్టులో నుంచి తప్పించారు. ఈ తరుణంలో సెలెక్షన్ కమిటీ మాజీ ఛైర్మన్.. జట్టులో మూడో స్థానం కోసం ఇంకా దారులు మూసుకుపోలేదని, మళ్లీ ఫస్ట్ క్లాస్ క్రికెట్కు వెళ్లి తిరిగి ఫామ్ సాధించవచ్చని పుజారాను ఉద్దేశించి కొన్ని వ్యాఖ్యలు చేశారు.
అయితే ఇంతకు ముందు కూడా జట్టులో స్థానం కోల్పోయినప్పుడు పుజారా.. ఇంగ్లాండ్కు వెళ్లి కౌంటీ క్రికెట్లో ససెక్స్ జట్టు తరఫున ఆడాడు. అక్కడ మంచి ప్రదర్శన కనబర్చిన పుజారా.. 2022లో ఇంగ్లాండ్తో జరిగిన టెస్టు మ్యాచ్తో టీమ్ఇండియాలోకి రీ ఎంట్రీ ఇచ్చాడు. ఆ మ్యాచ్తోనే పుజారా తన కెరీర్లో 100 టెస్టుల మైలురాయి అందుకున్నాడు. కాగా బంగ్లాదేశ్పై చేసిన పుజారా 102 పరుగులు మినహాయిస్తే.. అతడు గత మూడేళ్లుగా చెప్పుకొదగ్గ ప్రదర్శన కనబర్చలేదు. కేవలం 26 సగటుతో ఫామ్లేమితో నానాతంటాలు పడ్డాడు.
"ఈ ఏడాది ప్రారంభంలో స్వదేశంలో ఆస్ట్రేలియాతో జరిగిన సిరీస్లో విఫలమైన పుజారాను జట్టులో నుంచి తొలగించే సందర్భం వచ్చినప్పుడు.. డబ్ల్యూటీసీ ఫైనల్కు ముందు మార్పులు చేసేందుకు సెలెక్టర్లు ఇష్టపడలేదు. కానీ డబ్ల్యూటీసీ ఫైనల్లో పుజారా రెండు ఇన్నింగ్స్ల్లో విఫలమైన తర్వాత సెలెక్షన్ కమిటీ ఛైర్మన్ సుందర్ దాస్.. హెడ్ కోచ్ ద్రవిడ్తో అతడి గురించి తప్పక మాట్లాడి ఉంటాడు. మళ్లీ వరల్డ్ టెస్టు ఛాంపియన్షిప్ అనేది రెండేళ్ల పాటు జరిగే టోర్నీ.. ఇందుకోసం జట్టులో పెద్ద మార్పులు చేయలేం. పుజారా మూడేళ్లుగా ఫామ్ కోల్పోయి పేలవంగా ఆడుతున్నాడు. కోహ్లీ కూడా భారీ స్కోర్లు చేయకున్నా.. అతడు ఎప్పుడు ఫామ్ కోల్పోయినట్లు కనిపించలేదు. పుజారా ఆస్ట్రేలియా సిరీస్ తర్వాత సెలెక్టర్లకు తన ఫామ్పట్ల ఎప్పుడూ నమ్మకం కలిగించే ఇన్నింగ్స్ ఆడలేదు. అందుకే అతడిపై వేటు తప్పలేదు" అని సెలెక్షన్ ప్యానెల్ అధికారి ఒకరు తెలిపారు.
ఇక టెస్టుల్లో 103 మ్యాచ్లు ఆడిన పుజారా 176 ఇన్నింగ్స్ ల్లో 44.37 సగటుతో 7195 పరుగులు చేశాడు. ఇందులో 19 సెంచరీలు, 35 హాఫ్ సెంచరీలు ఉన్నాయి. కాగా గత మూడేళ్లలో పుజారా ఆడిన 48 ఇన్నింగ్స్ల్లో కేవలం ఒకే శతకం సాధించాడు. ఇందులో ఏకంకా ఐదుసార్లు డకౌట్గా వెనుదిరిగాడు. అయితే పుజారా తిరిగి ఫామ్ అందుకొని మళ్లీ టీమ్ఇండియా జట్టులో స్థానం సంపాదించాలని అతడి ఫ్యాన్స్ ఆశిస్తున్నారు.
