ఇంగ్లాండ్ పర్యటనలో ఉన్న పాకిస్థాన్ కెప్టెన్ బాబర్ అజామ్కు చేదు అనుభవం ఎదురైంది. తన కుటుంబ సభ్యులతో కలిసి డిన్నర్ కోసం హోటల్ బయటకు వెళ్లడానికి సెక్యూరిటీ సిబ్బంది అనుమతించలేదు. దీంతో అసహనానికి గురైన బాబర్.. ఇంగ్లాండ్తో జరుగుతున్న మూడో టెస్టు రెండో రోజు మొదటి గంట పాటు మైదానంలోకి రాకుండా డ్రెస్సింగ్ రూమ్లోనే ఉన్నాడు. సెక్యూరిటీ సిబ్బంది వ్యవహరించిన తీరుకు నిరసనగా బాబర్ ఇలా చేశాడని సమాచారం.
బాబర్తో పాటు జట్టులోని కొంత మంది సభ్యులు.. వారి కుటుంబాలతో సహా శనివారం డిన్నర్ కోసం హోటల్ బయటకు బయలుదేరారు. వారు హోటల్ నుంచి బయటకు వస్తుండగా వారిని సెక్యూరిటీ సిబ్బంది ఆపారు. ఎక్కడికి వెళ్తున్నారో చెప్పి సెక్యూరిటీ క్లియరన్స్ తీసుకోవాలని కోరారు. దీంతో కోపానికి గురైన బాబర్.. కొంతసేపు సెక్యూరిటీ సిబ్బందితో వాగ్వాదానికి దిగాడు. అనంతరం అసహనంతో తన గదిలోకి వెళ్లాడు. అయితే, ఈ రెండు జట్లకు అధ్యక్షుడి తరహా భద్రత ఏర్పాటు చేశారు.
మ్యాచ్ ప్రారంభమయ్యే సమయానికి బాబర్ మైదానంలోకి రాలేదు. గంటపాటు రాకుండా నిరసన తెలిపినట్టు సమాచారం. కాగా, ఈ విషయంపై పాకిస్థాన్ క్రికెట్ బోర్టు స్పందించలేదు. అయితే, తలనొప్పి కారణంగా బాబర్ గ్రౌండ్లోకి రాలేదని అధికారులు చెబుతున్నారు. మరోవైపు, ప్లేయర్లు కట్టుదిట్టమైన సెక్యూరిటీతో విసుగు చెందుతున్నామని వాపోతున్నట్టు తెలుస్తోంది.
