RR vs GT IPL 2022: ఐపీఎల్ 2022 సీజన్లో మరో రసవత్తరమైన పోరుకు రంగం సిద్ధమైంది. బలమైన బౌలింగ్, బ్యాటింగ్ లైనప్లతో దూసుకెళ్తున్న రాజస్థాన్ రాయల్స్, గుజరాత్ టైటాన్స్ గురువారం తలపడనున్నాయి. తొలి సీజన్లోనే వరుస మ్యాచుల్లో విజయంతో దూకుడుగా ఉన్న గుజరాత్ టైటాన్స్కు గత మ్యాచ్లో కళ్లెం వేసింది సన్రైజర్స్ హైదరాబాద్. తొలి ఓటమిని రుచి చూపించింది. ఈ క్రమంలో.. గత మ్యాచ్లో విజయంతో దూకుడు మీదున్న రాయల్స్ను టైటాన్స్ నిలువరిస్తుందా? హార్దిక్ సేనను మట్టి కరిపించి రాయల్స్ విజయాల పరంపరను కొనసాగిస్తుందా? అనేది మరికొన్ని గంటల్లో తేలిపోనుంది. ఈ నేపథ్యంలో ఇరు జట్ల బలాబలాలను ఓసారి పరిశీలిస్తే...
ఈ సీజన్లో బౌలింగ్లో అద్భుత ప్రదర్శనలు లేకపోయినా.. స్పిన్నర్లు, పేసర్లు ఉమ్మడిగా రాణిస్తూ రాజస్థాన్ రాయల్స్ను మేటి జట్లలో ఒకటిగా నిలుపుతున్నారు. కొత్త బంతితో ట్రెంట్ బౌల్ట్ నిప్పులు చెరుగుతున్నాడు. డెత్ ఓవర్లలోనూ అంతే అద్భుతంగా బంతులు విసురుతుండటం జట్టుగా ప్రధానబలంగా మారింది. క్రితం మ్యాచ్లో లఖ్నవూ సూపర్ జెయింట్స్పై తొలి ఓవర్లోనే కెప్టెన్ కేఎల్ రాహుల్, క్రిష్ణప్ప గౌతమ్లను పెవీలియన్ చేర్చి ఆ జట్టును దెబ్బకొట్టాడు. మరో ఎండ్లో ప్రసిద్ధ్ కృష్ణ వేగంగా బంతులు విసురతూ ప్రత్యర్థిని బెంబేలెత్తిస్తున్నాడు. యువ ఆటగాడు కుల్దీప్ సేన్ సైతం అద్భుతంగా బౌలింగ్ చేస్తున్నాడు. అరంగేట్రం మ్యాచ్లోనే ఒత్తిడిని జయించి చివరి ఓవర్లో 15 పరుగుల లక్ష్యాన్ని కాపాడి జట్టును గెలిపించాడు. స్పిన్నర్ల విషయానికి వస్తే.. టీమిండియా సీనియర్ ప్లేయర్ రవిచంద్రన్ అశ్విన్, యుజ్వేంద్ర చాహల్లు తమ మాయాజాలాన్ని కొనసాగిస్తున్నారు. ఈ సీజన్లో 11 వికెట్లతో అత్యధిక వికెట్లు తీసిన జాబితాలో తొలిస్థానంలో కొనసాగుతున్నాడు చాహల్.
రాజస్థాన్ రాయల్స్ బౌలింగ్ను ఛేదించి పరుగులు రాబట్టటం టైటాన్స్ బ్యాటర్లకు పరీక్షేనని చెప్పాలి. ఓపెనర్ శుభమన్ గిల్, కెప్టెన్ హార్దిక్ పాండ్యాలపైనే ఎక్కువగా ఆధారపడుతోంది గుజరాత్. మాథ్యూ వేడ్ పరుగులు సాధించటంలో ఇబ్బందులు పడుతున్నాడు. డేవిడ్ మిల్లర్ ఇంకా తనదైన శైలిని అందుకోలేదు. దీంతో యువకులైన.. అభినవ్ మనోహర్, సాయి సుదర్షన్లు ఆ బాధ్యతలను తీసుకోవాల్సి వస్తోంది. మ్యాచ్ ఫినిషర్గా రాహుల్ తెవాతియా అందరి దృష్టిని ఆకర్షిస్తున్నాడు. ప్రపంచస్థాయి ఫాస్ట్ బౌలర్లలో ఒకడైన ఫెర్గుసన్, టీమిండియా సీనియర్ ప్లేయర్ మహమ్మద్ షమీ, పాండ్యాలు రాణిస్తూ ప్రత్యర్థులను ఒత్తిడిలోకి నెడుతున్నారు. రషీద్ ఖాన్ పొదుపుగా బౌలింగ్ చేస్తూ తనవంతు పాత్ర పోషిస్తున్నాడు. అయితే.. సన్రైజర్స్ హైదరాబాద్తో జరిగిన మ్యాచ్లో టైటాన్స్ బౌలర్లు అంతగా ప్రభావం చూపకపోవటం జట్టును ఆలోచనలో పడేసింది. ఈ నేపథ్యంలో.. రాజస్థాన్ రాయల్స్ బలమైన బ్యాటింగ్ లైనప్ను ఏ విధంగా అడ్డుకుంటారనేది చూడాలి. ఐపీఎల్ 15వ సీజన్లో రెండు జట్లు నాలుగు మ్యాచ్లు ఆడి మూడింట విజయం సాధించాయి. నెట్రన్ రేట్తో పాయింట్స్ టేబుల్లో తొలిస్థానంలో కొనసాగుతోంది ఆర్ఆర్. గుజరాత్ టైటాన్స్ నెట్రన్ రేట్ కాస్త తగ్గడం వల్ల నాలుగో స్థానానికి పరిమితమైంది.
రాజస్థాన్ రాయల్స్: సంజు శాంసన్ (కెప్టెన్/వికెట్ కీపర్), జోస్ బట్లర్, యశస్వి జైస్వాల్, షిమ్రాన్ హెట్మెయర్, రవిచంద్రన్ అశ్విన్, యుజ్వేంద్ర చాహల్, ప్రసిద్ధ్ కృష్ణ, రియాన్ పరాగ్, నాథన్ కౌల్టర్ నైల్, దేవదత్ పడిక్కల్, నవదీప్ సైనీ, కరుణ్ నాయర్, రాస్సీ వాన్ డెర్ డస్సెన్, జేమ్స్ నీషమ్, అనునయ్ సింగ్, డారిల్ మిచెల్, ధ్రువ్ జురెల్, శుభమ్ గర్హ్వాల్, కుల్దీప్ యాదవ్, కుల్దీప్ యాదవ్, ఓబెద్ మెక్కాయ్.
గుజరాత్ టైటాన్స్: అభినవ్ మనోహర్, డేవిడ్ మిల్లర్, గుర్కీరత్ సింగ్, బి.సాయి సుదర్శన్, శుభ్మన్ గిల్, హార్దిక్ పాండ్యా (కెప్టెన్), రాహుల్ తెవాతియా, విజయ్ శంకర్, మాథ్యూ వేడ్, రహ్మానుల్లా గుర్బాజ్, వృద్ధిమాన్ సాహా, అల్జారీ జోసెఫ్, దర్శన్ నల్కండే, డొమినిక్ డ్రేక్స్, జయంత్ యాదవ్, లాకీ ఫెర్గూసన్, మహ్మద్ షమీ, నూర్ అహ్మద్, ప్రదీప్ సంగ్వాన్, రషీద్ ఖాన్, రవిశ్రీనివాసన్ సాయి కిశోర్, వరుణ్ ఆరోన్, యశ్ దయాళ్.
ఇదీ చూడండి: IPL 2022: ముంబయికి షాక్.. రోహిత్కు భారీ జరిమానా