India Bangladesh Series 2022: టీమ్ఇండియా బంగ్లాదేశ్ సిరీస్ ఆదివారం నుంచి మొదలవుతోంది. ఈ తరుణంలో భారత సారథి రోహిత్ శర్మ కీలక కామెంట్లు చేశాడు. మూడు వన్డేల సిరీస్లో.. బంగ్లా టీమ్తో తలపడటం అంత సులువేం కాదని చెప్పాడు. వారిపై గెలవాలంటే టీమ్ఇండియా చాలా కష్టపడాలని అన్నాడు. కాగా మొదటి వన్డే మ్యాచ్.. డాకాలోని 'షేర్-ఇ-బంగ్లా' జాతీయ స్టేడియం వేదికగా ఆదివారం జరగనుంది.
'చాలా సంవత్సరాలుగా ఇరు జట్ల మధ్య మంచి పోటీ ఉంది. కానీ గత 7-8 ఏళ్లుగా.. వాళ్లు (బంగ్లాదేశ్ జట్టు) చాలా ఇంప్రూవ్ అయ్యారు. వారితో మ్యాచ్ ఛాలెంజింగ్గా ఉంటోంది. మాకు సులువైన విజయాలు లేవు. ఇటీవల ముగిసిన టీ20 వరల్డ్ కప్లో కూడా భారత్-బంగ్లా మ్యాచ్లో ఆఖరి వరకు ఫలితం తేలలేదు. ఈ సిరీస్ చాలా ఎక్సైటింగ్గా ఉండబోతోంది. వాళ్లను ఓడించడానికి మేము బాగా ఆడాలి. ఎందుకంటే వాళ్లు వారి హోం గ్రౌండ్లో ఆడుతున్నారు' అని రోహిత్ శర్మ చెప్పుకొచ్చారు. కాగా, న్యూజిల్యాండ్ సిరీస్లో విశ్రాంతి తీసుకున్న సీనియర్లు రోహిత్ శర్మ, విరాట్ కోహ్లీ, కేఎల్ రాహుల్ కూడా జట్టులో తిరిగి చేరారు.
ఇప్పుడే చెప్పలేం..
బంగ్లాతో వన్డే సిరీస్.. రాబోయే వరల్డ్ కప్నకు సన్నద్ధమవుతున్నట్లు భావించవచ్చా? అన్న ప్రశ్నకు రోహిత్ శర్మ స్పందించాడు. ఆ మెగా టోర్నీకి ఇంకా సమయం ఉందని.. దాని గురించి ఇప్పుడే ఆలోచిండడం లేదని అన్నాడు. ఇంత ముందుగా ప్లాన్ చేస్తే అది వర్కౌట్ కాదన్నాడు. టీమ్.. ఏం చేయాలో, ఏ దిశలో వెళ్లాలో మేనేజ్మెంట్కు బాగా తెలుసు అని చెప్పాడు.
ఇవీ చదవండి : చిక్కుల్లో లక్ష్యసేన్.. వయసు విషయంలో మోసం చేశాడని ఫిర్యాదు
