బాలీవుడ్ హీరో సుశాంత్ ఆత్మహత్య కేసులో రోజుకో కొత్త కోణం వెలుగులోకి వస్తోంది. సీబీఐ, నార్కోటిక్స్ కంట్రోల్ బ్యూరో(ఎన్సీబీ), ఈడీ వంటి అగ్రశ్రేణి దర్యాప్తు సంస్థలు ఈ కేసును అనేక కోణాల్లో పరిశీలిస్తున్నాయి. బుధవారం రియా చక్రవర్తి తండ్రి ఇంద్రజిత్, సుశాంత్ స్నేహితుడు సిద్ధార్థ్ పితానీలను సీబీఐ ప్రశ్నించింది.
ఇద్దరు అరెస్ట్...
మరోవైపు రియా చక్రవర్తి సహచరుడు శామ్యూల్ మిరండాతో సంబంధం ఉన్న అబ్దుల్ బాసిత్ పరిహార్ అనే వ్యక్తిని నార్కోటిక్స్ కంట్రోల్ బ్యూరో(ఎన్సీబీ) అరెస్టు చేసింది. రియా సోదరుడు షోయిక్ చక్రవర్తి సూచనల మేరకు మిరండా డ్రగ్స్ సేకరించినట్లు ఎన్సీబీ తెలిపింది. ఈ కేసు దర్యాప్తులో భాగంగా ముంబయికి చెందిన జైద్ విలత్రానూ.. ఎన్సీబీ అధికారులు అదుపులోకి తీసుకున్నారు.
ఈడీ ఎదుట సుశాంత్ స్నేహితుడు...
సుశాంత్ స్నేహితుడు, వ్యాపార భాగస్వామి అయిన వరుణ్ మాథుర్ను బుధవారం ఎన్ఫోర్స్మెంట్ డైరెక్టరేట్(ఈడీ) ప్రశ్నించింది.
పట్నాలో సుశాంత్ మృతికి సంబంధించి నమోదైన కేసు చట్టబద్ధమైనదని ఆగస్టు 19న సుప్రీం కోర్టు పేర్కొంది. కేసును సీబీఐ దర్యాప్తు చేయాలని ఆదేశించింది. ఈ క్రమంలోనే రియా చక్రవర్తి సహా ఆమె కుటుంబ సభ్యులు, తదితరులపై కేసు నమోదు చేసి విచారణ ప్రారంభించింది సీబీఐ.
