ఫిలిప్పీన్స్లో జరిగిన ఘోర ప్రమాదంలో 30 మంది దుర్మరణం చెందారు. రైజాల్‌ ప్రావిన్స్‌లో ఓ ప్రయాణికుల పడవ బోల్తా పడటం వల్ల ఈ దుర్ఘటన జరిగింది. ప్రమాదంలో మరో 40 మందిని సహాయక సిబ్బంది సురక్షితంగా కాపాడారు. తుపాను గాలులకు పడవ ఊగిపోయిందని, ఈ క్రమంలో భయపడిన ప్రయాణికులు.. పడవలో ఒకవైపునకు రావడం వల్ల ప్రమాదం జరిగిందని అధికారులు వెల్లడించారు. ఘటన సమయంలో పడవలో ఎంతమంది ఉన్నారనేది తెలియాల్సి ఉందని చెప్పారు.
ప్రమాదానికి గురైన పడవ ఫిలిప్పీన్స్లోని అతిపెద్ద సరస్సు అయిన లాగునాలో ప్రయాణిస్తోంది. గురువారం బినన్గొనన్ నుంచి తాలిమ్ ద్వీపానికి ఈ పడవ బయలుదేరింది. అయితే, ఫిలిప్పీన్స్ తీరంలో ఇప్పటికే డోక్సురి అనే టైపున్ అల్లకల్లోలం సృష్టిస్తోంది. ఫలితంగా బలమైన గాలులు వీస్తున్నాయి. ఈ గాలులకు లాగునాలో ప్రయాణిస్తున్న పడవ తీవ్ర ఒడుదొడుకులు ఎదుర్కొంది. సరస్సులోని పడవ అటూఇటూ ఊగిపోయింది. దీంతో అందులోని ప్రయాణికులు భయాందోళనలకు గురయ్యారు. అంతా ఒకేవైపు వచ్చేయడం వల్ల పడవ బ్యాలెన్స్ తప్పింది. చివరకు బోల్తా పడింది. చివరకు పడవ నీటిలో మునిగిపోయవడం వల్ల 30 మంది చనిపోయారు. పోలీసులు, కోస్ట్ గార్డ్ సిబ్బంది సహాయక చర్యల నిమిత్తం రంగంలోకి దిగి 40 మందిని కాపాడారు. రెస్క్యూ ఆపరేషన్ ఇంకా కొనసాగుతోందని అధికారులు వెల్లడించారు. ఇదిలా ఉండగా.. టైఫున్ విధ్వంసానికి ఫిలిప్పీన్స్లో 9 మంది ప్రాణాలు కోల్పోయారు. అనేక మంది నిరాశ్రయులు అయ్యారని అధికారులు వెల్లడించారు.
రష్యాలో ఘోర ప్రమాదం
రష్యాలో ఓ హెలికాప్టర్ ల్యాండింగ్ సమయంలో ప్రమాదవశాత్తూ విద్యుత్ తీగలకు తగిలి కాలిపోయింది. సైబీరియాలో జరిగిన ఈ దుర్ఘటనలో ఆరుగురు మృతి చెందారు. ఏడుగురికి తీవ్ర గాయాలు అయ్యాయి. రష్యాకు చెందిన ఎంఐ-8 అనే హెలికాప్టర్ దక్షిణ సైబీరియాలోని ఆల్టై రిపబ్లిక్లో దిగేందుకు ప్రయత్నించింది. ఈ సమయంలో విద్యుత్ తీగలకు హెలికాప్టర్ తగిలింది. దీంతో ఒక్కసారిగా భారీగా మంటలు చెలరేగాయి. ఈ ఘటనలో హెలికాప్టర్ పూర్తిగా దగ్ధమైందని రష్యా ఎమర్జెన్సీ మంత్రిత్వ శాఖకు చెందిన ఆల్టై విభాగం వెల్లడించింది. ప్రమాదానికి సంబంధించిన వీడియో సోషల్ మీడియాలో చక్కర్లు కొడుతోంది. హెలికాప్టర్ మంటల్లో కాలిపోవడం అందులో కనిపిస్తోంది.
ప్రమాదానికి గురైన హెలికాప్టర్ ప్రైవేటు కంపెనీకి చెందినదని వెల్లడించారు. టూరిస్టులను అది తీసుకొస్తుండగా ఘటన జరిగిందని చెప్పారు. హెలికాప్టర్లో 15 మంది ప్రయాణిస్తున్నారని రష్యా మీడియా సంస్థ తెలిపింది. ముగ్గురు సిబ్బంది ఉన్నట్లు వెల్లడించింది. అయితే అధికారులు మాత్రం హెలికాప్టర్లో 13 మందే ఉన్నట్లు చెప్పారు. దీనిపై స్పష్టత రావాల్సి ఉంది.
