అమెరికా అధ్యక్షుడు డొనాల్డ్ ట్రంప్ మాజీ ప్రచార నిర్వాహకుడు బ్రాడ్ పార్స్కేల్ ఆసుపత్రిలో చేరారు. తనకు తానుగా హాని చేసుకుంటానని ఆయన బెదిరించినట్లు ఫ్లోరిడా పోలీసులు వెల్లడించారు. ఈ విషయానికి సంబంధించి బ్రాడ్ భార్య సమాచారం ఇచ్చారని తెలిపారు. పార్స్కేల్ తన వద్ద ఆయుధాలు ఉన్నాయంటూ బెదిరించారని వివరించారు.
ఆయనను ఆసుపత్రిలో చేర్చినట్లు పోలీస్ అధికారి డీఅన్నా గ్రీన్లా తెలిపారు. అమెరికా చట్టాల ప్రకారం ఎవరైనా తనకు తానుగా గాయపరుచుకునేందుకు ప్రయత్నిస్తే మానసిక ఆరోగ్యంపై పరీక్షించేందుకు 72 గంటల పాటు అదుపులోకి తీసుకుంటారు.
పార్స్కేల్, ఆయన కుటుంబానికి ఎలాంటి సాయమైనా చేసేందుకు సిద్ధంగా ఉన్నామని ట్రంప్ ప్రచార విభాగ అధికారి టిమ్ ముర్తాఫ్ తెలిపారు. ట్రంప్ అల్లుడు జేర్డ్ కుష్నర్ నేతృత్వంలో 2016 ఎన్నికల ప్రచారంలో పార్స్కేల్ కీలకంగా పనిచేశారు. పార్స్కేల్ను ఈ ఏడాది జులైలో ప్రచార విభాగం మేనేజర్ పదవి నుంచి తొలగించారు. అనంతరం ఆయన డిజిటల్ కార్యకలాపాల్లో ప్రచార విభాగానికి సాయం అందిస్తున్నారు.
ఇదీ చూడండి: రెండేళ్లలో ట్రంప్ పన్ను చెల్లింపులు 750 డాలర్లు మాత్రమే!
