భారత ఆధారిత కాల్సెంటర్లకు నిధులు సమకూర్చడం సహా వాటి కార్యకలాపాల్లో పాల్గొని.. 2013-16 మధ్యకాలంలో అమెరికన్ల నుంచి మిలియన్ డాలర్లు దోచుకున్న నేరం కింద ఓ భారతీయుడికి 20ఏళ్ల జైలు శిక్ష విధించింది అగ్రరాజ్య కోర్టు. విడుదల తర్వాత కూడా అతడి కదలికల్ని మూడేళ్ల పాటు పర్యవేక్షించాలని అదేశించింది.
టెక్సాస్ దక్షిణ జిల్లా కోర్టు జడ్జి డేవిడ్ హిట్నర్.. అహ్మదాబాద్కు చెందిన హితేశ్ మధుభాయ్ పటేల్(44)కు శిక్ష ఖరారు చేశారు. మోసానికి కుట్ర పన్నడం, మనీలాండరింగ్, ఫెడరల్ అధికారిలా గుర్తింపు మార్చుకున్న అభియోగాలపై ఈ శిక్ష విధించారు. వీటితో పాటు బాధితులకు 89,70,396 డాలర్లు చెల్లించాలని ఆదేశించారు.
మోసం ఇలా..
అమెరికన్ల నుంచి డబ్బులు దోచుకునేందుకు పెద్ద ప్రణాళిక రచించారు పటేల్, అతని సహచరులు. అహ్మదాబాద్లోని తమ కాల్ సెంటర్ల ఉద్యోగులతో అమెరికన్లకు ఫోన్లు చేయించేవారు. వారిని వారు ఐఆర్ఎస్, యూఎస్సీఐసీ(యూఎస్ పౌర-వలస సేవల) అధికారులుగా పరిచయం చేసుకునేవారు. బాధితులను అరెస్ట్ చేస్తామని, జైలులో వేస్తామని, భారీగా జరిమానా విధిస్తామని బెదిరించేవారు. వాటి నుంచి తప్పించుకోవాలంటే.. తమకు కొంత నగదు చెల్లించాలని డిమాండ్ చేసేవారు. పేమెంట్స్ అందిన వెంటనే.. అమెరికాలోని తమ సహచరులతో వాటిని లిక్విడేట్ చేసుకునేవారు. విచారణలో భాగంగా.. ఈ నేరాన్ని పటేల్ అంగీకరించినట్టు అధికారులు వెల్లడించారు.
ఇదీ చూడండి:- కొవిడ్ టీకాలతో కొత్త కుంభకోణాలు
