కంటికి కనిపించని శత్రువుతో బయటకు కనిపించని యుద్ధం చేస్తున్నాం. కరోనా వైరస్ ఎలా సంక్రమిస్తుందో, ఎలా వ్యాప్తి చెందుతుందో ఇప్పటికీ స్పష్టంగా తెలియదు. ఈ వ్యాధిని ఎదుర్కోవాలంటే వ్యాక్సిన్ కావాల్సిందే. కానీ.. ఇప్పుడప్పుడే వ్యాక్సిన్ అందుబాటులోకి వచ్చే అవకాశం లేదు. ఈ మహమ్మారి నుంచి మనల్ని మనం రక్షించుకోవాలంటే స్వీయ నియంత్రణ తప్ప మరో మార్గం లేదు.
కరోనా మహమ్మారి విజృంభణను అడ్డుకునేందుకు కేంద్ర, రాష్ట్ర ప్రభుత్వాలు లాక్డౌన్ విధించడంతో అన్ని రకాల పరిశ్రమలు, సంస్థలు మూతపడి, పనులన్నీ ఎక్కడివక్కడే ఆగిపోయాయి. చాలా మంది ఉపాధి కోల్పోయి, కనీస నిత్యవసరాలు కూడా కొనుగోలు చేయలేకపోతున్నారు.
ఈ పరిస్థితిని గమనించిన తెలంగాణలోని కామారెడ్డి కలెక్టర్ శరత్... పట్టణంలోని స్వయం సహాయక బృందాలకు చక్కని అవకాశాన్ని కల్పించారు. మెప్మా సహాయంతో తక్కువ ధరకే పునర్వినియోగ మాస్క్లు తయారుచేసేలా ప్రోత్సహించారు. ఈ తోడ్పాటు ఫలితంగానే రాష్ట్రంలోనే తొలి మాస్క్ల బజార్... ఏప్రిల్ 30న కామారెడ్డి జిల్లాలో ప్రారంభమైంది.
మాస్క్ల తయారీతో ఉపాధి
జిల్లాలోని స్వశక్తి సంఘాల మహిళలు తక్కువ ధరకే పునర్వినియోగ, నాణ్యమైన మాస్క్ల తయారీకి శ్రీకారం చుట్టారు. లాక్డౌన్తో ఉపాధి కరవైన వేళ మహిళా సమాఖ్య సభ్యులు ఒక బృందంగా ఏర్పడ్డారు. నిరుపేదలు సైతం కొనుగోలు చేసే విధంగా మాస్క్లు తయారు చేస్తూ ఉపాధి పొందుతున్నారు. 15 కుటుంబాలు ఈ పనిలో నిమగ్నమయ్యాయి.
ఒక్కొక్కరు రోజుకు 250 నుంచి 300... మొత్తంగా కలిపి సుమారు 8,000 మాస్క్ల వరకు తయారుచేస్తున్నామన్నారు. ఒక్కో మాస్క్ తయారీకీ అయ్యే ఖర్చు ఐదు రూపాయలు కాగా... బజార్లో వీటిని పది రూపాయలకి విక్రయిస్తున్నామని తెలిపారు. అంతేగాక బయట లభించే మాస్కులు ఒకసారి మాత్రమే వాడటానికి వీలుగా ఉంటాయని... కానీ తమ స్త్రీశక్తి మాస్క్లు కాటన్ వస్త్రంతో తయారు చేయడం వల్ల శుద్ధి చేసి ఎన్ని సార్లు అయినా వాడుకోవచ్చని అంటున్నారు.
జిల్లా కలెక్టర్ శరత్ తోడ్పాటు
స్వయం సహాయక బృంద మహిళలకు తోడ్పాటునందించేందుకు జిల్లా కలెక్టర్ శరత్... 'స్త్రీశక్తి మాస్క్ల బజార్' ఏర్పాటు చేయాలని ఆదేశించారు. కామారెడ్డిలో మహిళా సమాఖ్య ఆధ్వర్యంలో జిల్లా కేంద్రంలో 3 బజార్లు ఏర్పాటే కాక 22 మండల కేంద్రాల్లోనూ వీటిని తెరిచారు. బాన్సువాడ, ఎల్లారెడ్డి పురపాలికల్లో త్వరలో ఏర్పాటు చేయనున్నారు.
జిల్లాలోని ప్రతి ప్రభుత్వ ఉద్యోగి వీరి వద్ద రెండేసి మాస్క్ల చొప్పున కొనుగోలు చేయాలని కలెక్టర్ ఆదేశించారు. అంతేగాక మహిళా సమాఖ్య సభ్యులు సైతం ఒక్కొక్కరు రెండేసి మాస్క్ల చొప్పున కొనుక్కోవాలని తీర్మానించుకున్నారు. ఈ విధంగా కామారెడ్డి మున్సిపాలిటీలో 30,000 పైగా మాస్కులు విక్రయించామరు. ఇప్పటి వరకు 52,000 మాస్క్లు తయారు చేశారు. లక్ష మాస్క్లు తయారుచేసి విక్రయించడమే లక్ష్యమన్నారు.. స్త్రీశక్తి మాస్క్ల బజార్ నిర్వాహకులు.
ఇదీ చూడండి:
