Disinvestment of Pawan Hans Limited: పెట్టుబడుల ఉపసంహరణ కార్యక్రమంలో భాగంగా మరో ప్రభుత్వ సంస్థ విక్రయానికి గ్రీన్ సిగ్నల్ ఇచ్చింది కేంద్ర ప్రభుత్వం. పవన్ హాన్స్ సంస్థలోని మొత్తం 51 శాతం వాటాను అమ్మేందుకు సీసీఈఏ ఆధ్వర్యంలోని కమిటీ ఆమోదం తెలిపింది. రూ.211.14 కోట్లతో స్టార్9 మొబిలిటీ ప్రైవేటు లిమిటెడ్ దాఖలు చేసిన బిడ్ను ఓకే చేసింది. సీసీఈఏ ఆధ్వర్యంలోని కమిటీలో కేంద్ర మంత్రులు నితిన్ గడ్కరీ, నిర్మలా సీతారామన్, జోతిరాదిత్య సింధియాలు ఉన్నారు.
పవన్ హాన్స్లోని కేంద్ర ప్రభుత్వం మొత్తం వాటాను విక్రయించేందుకు సీసీఈఏ 2016, అక్టోబర్లోనే ఆమోద ముద్రవేసినట్లు ఆర్థిక శాఖ తెలిపింది. గతంలో మూడుసార్లు బిడ్లు పిలిచినప్పటికీ కార్యరూపం దాల్చలేదని పేర్కొంది. గత మూడేళ్లుగా పవన్ హాన్స్ నష్టాలను చవిచూస్తోందని వెల్లడించింది. లావాదేవీల సలహాదారు, ఆస్తి విలువ అంచనా ప్రకారం రూ.199.02 కోట్లకు విక్రయించేందుకు నిర్ణయించినట్లు తెలిపింది. అత్యధిక ధరకు బిడ్ దాఖలు చేసిన స్టార్9 మొబిలిటీ.. కేంద్రం వాటాను కొనుగోలు చేయనున్నట్లు స్పష్టం చేసింది.
"గత ఏడాది డిసెంబర్లో మూడు బిడ్లు దాఖలయ్యాయి. స్టార్9 మొబిలిటీ ప్రైవేట్ లిమిటెట్(బిగ్ ఛార్టర్ ప్రైవేట్ లిమిటెడ్, మహరాజా ఏవియేషన్ ప్రైవేట్ లిమిటెడ్, అల్మాస్ గ్లోబల్ ఆపర్చ్యూనిటీస్ ఫండ్ ఎస్పీసీల కన్సార్టియం) రూ.211.14 కోట్లతో అత్యధిక ధర బిడ్గా నిలిచింది. మిగిలిన రెండు బిడ్లు రూ.181.05, రూ.153.15 కోట్లకు దాఖలయ్యాయి. చివరగా స్టార్9 బిడ్కు కేంద్రం ఓకే చెప్పింది."
- కేంద్ర ఆర్థిక శాఖ
పవన్ హాన్స్ సంస్థ.. కేంద్ర ప్రభుత్వం, ఓఎన్జీసీ నేతృత్వంలోని జాయింట్ వెంచర్. ఈ సంస్థ హెలికాప్టర్, ఎయిరో మొబిలిటీ సేవలను అందిస్తోంది. కేంద్ర ప్రభుత్వానికి ఈ సంస్థలో 51 శాతం వాటా ఉండగా.. ఓఎన్జీసీకి 49 శాతం ఉంది. గతంలోనే కేంద్ర ప్రభుత్వ నిర్ణయించిన ధర, నిబంధనలకు తన మొత్తం వాటాను విక్రయించేందుకు ఓఎన్జీసీ అంగీకారం తెలిపింది.
ఇదీ చూడండి: 'అప్పటికల్లా దేశీయ చిప్‌ల తయారీయే మా లక్ష్యం'
