Stock Market Closing: స్టాక్ మార్కెట్లు లాభాల్లో ముగిశాయి. గత సెషన్లో నష్టపోయిన దేశీయ సూచీలు.. గురువారం లాభాల బాటపట్టాయి. బొంబాయి స్టాక్ ఎక్స్చేంజి సూచీ సెన్సెక్స్ 701 పాయింట్లు పెరిగి.. 57 వేల 521 వద్ద స్థిరపడింది. జాతీయ స్టాక్ ఎక్స్చేంజి సూచీ నిఫ్టీ 206 పాయింట్లు లాభపడి 17 వేల 245 వద్ద సెషన్ను ముగించింది.
- 57,296 పాయింట్లతో ప్రారంభమైన సెన్సెక్స్ ఓ దశలో 56,936 పాయింట్ల కనిష్ఠానికి చేరుకుంది. ఈ సెషన్లో గరిష్ఠంగా 57,790 పాయింట్లకు సెన్సెక్స్ చేరుకుంది.
- 17189 పాయింట్లతో ప్రారంభమైన నిఫ్టీ.. 17,071 పాయింట్ల కనిష్ఠాన్ని, 17,311 పాయింట్ల గరిష్ఠాన్ని నమోదు చేసింది.
- ఫార్మా, పవర్, ఆటో, ఆయిల్ & గ్యాస్ షేర్లు కొనుగోలు చేసేందుకు మదుపర్లు ఆసక్తి చూపగా.. ఐటీ, మెటల్, రియల్ఎస్టేట్ షేర్లను మదుపర్లు విక్రయించారు.
- హిందుస్థాన్ యూనిలివర్, ఏసియన్ పేయింట్, పవర్గ్రిడ్, హెచ్డీఎఫ్సీ లైఫ్, యూపీఎల్ షేర్లు లాభాలు నమోదు చేశాయి.
- బజాజ్ ఆటో, హిందాల్కో, భారతీ ఎయిర్టెల్, మహీంద్రా అండ్ మహీంద్రా, అదానీ పోర్ట్స్ షేర్లు నష్టాలు చవిచూశాయి.
Reliance Industries MCAP: బుధవారం సెషన్లో మార్కెట్ క్యాపిటలైజేషన్ (ఎంక్యాప్) విలువ రూ. 19 లక్షల కోట్ల మార్కును తాకిన రిలయన్స్ ఇండస్ట్రీస్ గురువారం ఆ స్థానాన్ని స్థిరపరుచుకుంది. దీంతో ఈ స్థాయి మార్కెట్ విలువను చేరుకున్న తొలి భారత కంపెనీగా రిలయన్స్ ఇండస్ట్రీస్ నిలిచింది. గురువారం సెషన్ ముగిసే సమయానికి ఎంక్యాప్ విలువ రూ.19,07,176.65 కోట్లకు చేరుకుంది. ఓ దశలో కంపెనీ షేర్లు 2.59 శాతం మేర పెరిగి రూ.2,850 వద్ద జీవనకాల గరిష్ఠాన్ని తాకాయి. మార్కెట్లు ముగిసే సమయానికి షేరు విలువ రూ.2,819.20 వద్ద స్థిరపడింది. అంతకుముందు.. బుధవారం సెషన్లో కూడా రిలయన్స్ కంపెనీ షేర్లు స్టాక్ మార్కెట్లలో మంచి లాభాలతో ట్రేడయ్యాయి. అదే సమయంలో మార్కెట్ విలువ రూ. 19 లక్షల కోట్ల మార్కును అధిగమించి.. రూ. 19.12 లక్షల కోట్లకు చేరింది.
