Spider Man Thief: దేశ రాజధాని దిల్లీలో ఓ యువకుడు.. స్పైడర్ మ్యాన్ చేసిన సాహసాలను స్ఫూర్తిగా తీసుకున్నాడు. అయితే ఆ స్పైడర్ మ్యాన్ మనుషుల ప్రాణాలు కాపాడితే.. ఈ యువకుడు మాత్రం ఆ సాహసాలే చేస్తూ వరుస చోరీలకు పాల్పడుతున్నాడు. అచ్చం స్పైడర్ మ్యాన్లాగే పెద్ద పెద్ద భవనాలపైకి పాకుతూ విలువైన వస్తువులను దోచుకుంటున్నాడు. ఆ రీతిలోనే మే 31న ఖజూరీ ఖాస్ ప్రాంతంలో ఉన్న ఓ ఇంట్లోకి చొరబడి బంగారం, మొబైల్ ఫోన్ను దోచుకుని విద్యుత్ తీగ సాయంతో దిగి పారిపోయాడు.
దొంగతనాన్ని విజయవంతంగా పూర్తి చేశాడు కానీ ఆ ఇంటి చుట్టూ ఉన్న సీసీ కెమెరాలను గుర్తించలేదు. దీంతో అడ్డంగా బుక్కయ్యాడు ఆ 'స్పైడర్ మ్యాన్' దొంగ. సీసీటీవీ ఫుటేజ్ల ఆధారంగా బాధితులు పోలీసులకు ఫిర్యాదు చేశారు. వాటిని చూసిన పోలీసులు అవాక్కయ్యారు. ఎందుకంటే ఆ దొంగ మొదట ఇంటి బయట పార్క్ చేసిన కారుపైకి ఎక్కి.. ఆపై విద్యుత్ తీగల సహాయంతో ఇంట్లోకి చొరబడి దోచుకెళ్లాడు. ఇక, పోలీసులు ఆ దొంగ కోసం గాలిస్తున్నారు.
''మే31న అర్థరాత్రి మా ఇంట్లోకి దొంగతనం జరిగింది. బీరువాలో ఉన్న బంగారు వస్తువులు, గొలుసు, ఉంగరాలు, మొబైల్ తదితర వస్తువులను ఎత్తుకెళ్లాడు. అర్ధరాత్రి నీటికోసం లేచిన మా అమ్మ కాలి చప్పుడు విని పారిపోయాడు. సీసీఫుటేజ్ల ఆధారంగా పోలీసులకు ఫిర్యాదు చేశాం.''
-- సురేంద్రసింగ్, బాధితుడు
ఇవీ చదవండి: దేశంలో తొలి మిర్రర్ టెలిస్కోపు.. ఆసియాలోనే పెద్దది.. ప్రపంచంలో ప్రథమం!
