"మీరు నిద్రలో చూసేవి కలలు కాదు.. మిమ్మల్ని నిద్రపోనివ్వకుండే చేసేవే కలలు" అన్న అబ్దుల్ కలామ్ మాటలకు అనుగుణంగా మధ్యప్రదేశ్ సాగర్లోని ఓ వ్యక్తి తన 22 ఏళ్ల స్వప్నాన్ని కౌన్ బనేగా కరోడ్పతి షో ద్వారా సాకారం చేసుకున్నాడు. 16వ ఏట అనుకున్న ఆ లక్ష్యాన్ని తన 38వ ఏట సాధించాడు. ఇంతకీ ఈ వ్యక్తి ఎవరో తెలుసుకుందామా ?
మధ్యప్రదేశ్లోని సాగర్కు చెందిన 38 ఏళ్ల భూపేంద్ర చౌదరికి చిన్నప్పటి నుంచే కేబీసీ షో అంటే ఎంతో ఇష్టం. ఆ షో మీదున్న మక్కువతో ఎన్నో సార్లు అందులో పాల్గొనాలనుకున్నాడు. కానీ ఫలితం లేకుండా పోయింది. అలా తన 16వ ఏట ప్రారంభించిన ఆ ప్రయత్నాలు ఆఖరికి 38వ ఏట ఫలించాయి.
నవంబర్ 10న టెలికాస్ట్ కానున్న ఈ ప్రోగ్రాంకు సంబంధించిన ప్రోమోను చూసినట్లయితే ఇందులో ఆయన దాదాపు రూ.50 లక్షలు గెలిచినట్లు తెలుస్తోంది. గుజరాత్‌లోని దాహోద్‌లో వ్యవసాయ నిపుణుడిగా పని చేస్తున్న భూపేంద్ర హాట్ సీట్కు అంత ఈజీగా వెళ్లలేదు. దాదాపు 400 ప్రశ్నలకు సమాధానం చెప్పి టాప్ 10 కంటెస్టెంట్గా నిలిచాడు. అలా మరో రౌండ్కు అర్హత సంపాదించాడు.
హాట్ సీట్లో కూర్చునే ముందు ఆడే ఆ గేమ్ ఆద్యంతం హోరాహోరీగా సాగుతుంది. 'ఫాస్టెస్ట్ ఫింగర్' అనే ఈ గేమ్లో టాప్ 10 కంటెస్టెంట్స్ను మూడు జనరల్ నాలెడ్జ్ ప్రశ్నలు అడుగుతారు. వాటికి ఎవరైతే సమాధానం చెబుతారో వారినే హాట్ సీట్ వరిస్తుంది. చివరకు.. బిగ్బీ ముందు హాట్ సీట్లో కూర్చున్నాడు. దీంతో ఆయన ఆనందం అంతా ఇంతా కాదు. ఈ విషయాన్ని బిగ్బీతో పంచుకుని తన ఆనందాన్ని వ్యక్తం చేశాడు. తన కల నేరవేరడం వల్ల ఎంతో సంతోషంగా ఉందని తెలిపిన ఆయన ఇప్పుడు ఈ షో వల్ల తన గ్రామం మరింత పాపులర్ అవుతుందని హర్షం వ్యక్తం చేశాడు.
ఇదీ చదవండి:సైనికుల పటిష్ఠ పహారా.. ప్రశాంతతకు ఆవల.. తుపాకుల గర్జన!
