ETV Bharat / bharat

సీఎం గుడ్​న్యూస్.. రూ.500కే గ్యాస్ సిలిండర్.. 14లక్షల కుటుంబాలకు లబ్ధి

author img

By

Published : Jun 5, 2023, 3:12 PM IST

Updated : Jun 5, 2023, 3:48 PM IST

తమ రాష్ట్ర ప్రజలకు గుడ్​న్యూస్ చెప్పారు రాజస్థాన్ సీఎం అశోక్ గహ్లోత్. రూ.500కే ఎల్​పీజీ సిలిండర్లు ఇవ్వడం ప్రారంభిస్తున్నట్లు చెప్పారు. 14 లక్షల కుటుంబాలకు ఈ గ్యాస్ సబ్సిడీ అందించనున్నట్లు తెలిపారు.

rajasthan-cylinder-subsidy
rajasthan-cylinder-subsidy

Rajasthan cylinder subsidy : రాష్ట్రంలోని 14 లక్షల కుటుంబాలకు రూ.500కే గ్యాస్ సిలిండర్ అందించనున్నట్లు రాజస్థాన్ ముఖ్యమంత్రి అశోక్ గహ్లోత్ ప్రకటించారు. ఇందిరా గాంధీ గ్యాస్ సిలిండర్ సబ్సిడీ స్కీమ్ కింద.. సోమవారమే సిలిండర్లు అందజేయనున్నట్లు తెలిపారు. ఒక్కో సిలిండర్​పై రూ.640 సబ్సిడీ ఇవ్వనున్నట్లు వెల్లడించారు. గతంలో తాను ఇచ్చిన హామీకి అనుగుణంగా తాజా పథకాన్ని ప్రవేశపెట్టినట్లు తెలిపారు. వాస్తవానికి.. రాష్ట్రంలో 80 లక్షల కుటుంబాలు ఈ పథకం పరిధిలోకి వస్తాయని గహ్లోత్ పేర్కొన్నారు. అయితే.. ఇందుకు సంబంధించి కేంద్ర ప్రభుత్వం నుంచి సరైన గణాంకాలు రాలేదని తెలిపారు. రాష్ట్ర స్థాయిలో సేకరించిన సమాచారం ప్రకారం అర్హులను గుర్తించి, ప్రస్తుతానికి 14 లక్షల కుటుంబాలకు సిలిండర్ సబ్సిడీ అందిస్తున్నట్లు చెప్పారు.

ఈ సందర్భంగా ప్రధానమంత్రి నరేంద్ర మోదీ, బీజేపీపై విమర్శలు గుప్పించారు గహ్లోత్. తమ ప్రభుత్వం చేపట్టిన అభివృద్ధి కార్యక్రమాలపై మాట్లాడేందుకు విపక్షాల వద్ద ఏమీ లేదని గహ్లోత్ చెప్పారు. తాము ప్రవేశపెట్టిన పథకాలు.. ఎన్నికలను దృష్టిలో పెట్టుకొని కాదని, శాశ్వతంగా ఉంటాయని అన్నారు. మోదీ అహంకారం, మొండి పట్టుదల వల్లే ఇటీవల హిమాచల్​ప్రదేశ్, కర్ణాటక ఎన్నికల్లో బీజేపీ ఓడిపోయిందని ఎద్దేవా చేశారు.

"ప్రభుత్వ ఉద్యోగుల కోసం పాత పింఛను విధానాన్ని పునరుద్ధరించాలని అప్పటి హిమాచల్ సీఎం.. మోదీకి సూచించారు. కానీ మోదీ మొండిపట్టు పట్టి అందుకు ఓకే చెప్పలేదు. ప్రజాస్వామ్యంలో ఎవరి అహంకారం పనిచేయదు. ప్రజాస్వామ్యంలో మొండితనానికి తావు లేదు. ప్రతి ఒక్కరూ ఓటర్లకు తలవంచాల్సిందే. త్వరలో అనేక రాష్ట్రాల్లో బీజేపీ ఓటమిపాలవుతుంది."
-అశోక్ గహ్లోత్, రాజస్థాన్ సీఎం

'మ్యాజిక్ చేసి డబ్బు సంపాదిస్తా'
జోధ్​పుర్​లో పర్యటించిన గహ్లోత్.. అక్కడ కొత్తగా నిర్మించిన 'రావు జోధా మార్గ్'ను ప్రారంభించారు. తాను జోధ్​పుర్​కు ప్రథమ సేవకుడినని అభివర్ణించుకున్నారు. జోధ్​పుర్ అభివృద్ధి కోసం అవసరమైతే.. మ్యాజిక్​ చేసి డబ్బులు సంపాదిస్తానని చెప్పుకొచ్చారు. 42 ఏళ్ల క్రితం జోధ్​పుర్​లో నీళ్లు కూడా ఉండేవి కాదని.. ఇప్పుడు అన్ని సౌకర్యాలు వచ్చాయని తెలిపారు.

"42 ఏళ్ల క్రితం జోధ్​పుర్ నుంచి తొలిసారి నేను ఎంపీగా గెలిచాను. అప్పుడు ఈ ప్రాంతం ఎలా ఉండేది? ఇక్కడ నీళ్లు ఉండేవి కాదు. రైలు మార్గం లేదు. కానీ ఇప్పుడు పరిస్థితులు పూర్తిగా మారిపోయాయి. విద్యుత్ సౌకర్యం వచ్చింది. రైళ్లు, రోడ్లు, నీటి సరఫరా, విద్య, ఆరోగ్యం వంటి మౌలిక సదుపాయాలన్నీ సమకూర్చగలిగాం. అభివృద్ధి అంటే ఏంటో జోధ్​పుర్​కు వచ్చి ఎవరైనా అధ్యయనం చేస్తే తెలుస్తుంది. ఈ ప్రాంత అభివృద్ధి కోసం మరింత కృషి చేస్తా. డబ్బు అవసరమైతే మ్యాజిక్ షోలు చేసి సంపాదిస్తా. కానీ, ఇక్కడి ప్రజలను మాత్రం నిరాశపర్చను."
-అశోక్ గహ్లోత్, రాజస్థాన్ సీఎం

వృత్తిరీత్యా మ్యాజిక్ చేసే జోధ్​పుర్ కుటుంబంలో జన్మించారు అశోక్ గహ్లోత్. అయితే, గహ్లోత్ వ్యాఖ్యలపై బీజేపీ వ్యంగ్యంగా స్పందించింది. గహ్లోత్ తన పదవీకాలంలో మ్యాజిక్ ట్రిక్స్ మాత్రమే ప్రదర్శిస్తున్నారని చెప్పుకొచ్చింది. కేంద్ర ప్రభుత్వ పథకాల పేర్లు మార్చి.. తన పేరు చెప్పుకుంటున్నారని ఆరోపించింది. ప్రభుత్వ కార్యాలయాల్లో బంగారం, నగదు దొరకడం.. మ్యాజికేనని బీజేపీ రాజస్థాన్ అధ్యక్షుడు సీపీ జోషి సెటైర్లు వేశారు.

Last Updated : Jun 5, 2023, 3:48 PM IST
ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.