చలికాలంలో గంగాస్నానం చేయాలని అనుకుంటున్నారా? కానీ, చలిని తట్టుకోలేమని వెనకడుగు వేస్తున్నారా? అయితే, మీలాంటి వారి కోసమే ఓ వ్యక్తి వినూత్న ప్రకటన చేశాడు. 'మీ బదులుగా గంగానదిలో స్నానం చేస్తా. అందుకు పది రూపాయలు ఇవ్వండి' అంటూ వీడియో విడుదల చేశాడు. ప్రస్తుతం ఈ వీడియో వైరల్గా మారింది. ఉత్తరాఖండ్ హరిద్వార్లోని హర్ కి పౌరి సమీపంలోని ఘాట్ వద్ద ఈ వీడియోను తీశాడు మనోజ్ నిషాద్ అనే వ్యక్తి.
ఈవెంట్ మేనేజర్గా పనిచేస్తున్న మనోజ్ నిషాద్... హరిద్వార్ ఉత్తర ప్రాంతంలో అందరికీ సుపరిచితమే. అయితే కొద్ది రోజుల క్రితం మనోజ్ నిషాద్ ఓ యూట్యూబ్ ఛానెల్ ఓపెన్ చేశాడు. అందులో ఫన్నీ వీడియోలు చేసి, పోస్ట్ చేస్తున్నాడు. ఇప్పుడు చేసిన వీడియో కూడా అలాగే చేసిందే. చాలా మంది ప్రముఖులు ఈ వీడియోను షేర్ చేశారు. దీంతో ఆ వీడియో వైరల్గా మారింది.
"ఈ వీడియో ఇంతగా వైరల్ అవుతుందని నాకూ తెలియదు. కేవలం వినోదం కోసమే ఈ వీడియో చేశాను. చాలా మంది నాకు ఫోన్ చేస్తున్నారు. హరిద్వార్ నుంచే కాకుండా వివిధ రాష్ట్రాల నుంచి కాల్స్ వస్తున్నాయి" అని మనోజ్ తెలిపారు. వీడియో వైరల్ అవ్వడం పట్ల చాలా సంతోషంగా ఉన్నట్లు ఆయన వెల్లడించారు.
కాగా, మనోజ్ నిషాద్ ఓ సామాజిక కార్యకర్త కూడా. తమ ప్రాంతంలో ఆసుపత్రి ఏర్పాటు చేయాలని డిమాండ్ చేస్తూ చాలా రోజులు ప్రభుత్వంపై పోరాటం చేశాడు. ఇతని కృషి కారణంగానే ప్రభుత్వం.. ఆసుపత్రిని మంజూరు చేసింది.
