Girlfriend Power Cut To Meet Boyfriend : ప్రేమికుడిని రహస్యంగా కలుసుకోడానికి ఓ ప్రియురాలు వింత పని చేసింది. ప్రతి రోజు రాత్రి ట్రాన్స్ఫార్మర్ వద్దకు వెళ్లి విద్యుత్ సరఫరాను నిలిపివేసేది. అనంతరం ప్రియుడితో ప్రేమలో మునిగిపోయేది. అనుమానం వచ్చిన గ్రామస్థులు ఆరా తీసి.. ప్రేమికులను ఏకాంతంగా ఉన్న సమయంలో రెడ్హ్యాండెడ్గా పట్టుకున్నారు. అనంతరం యువకుడికి దేహశుద్ధి చేశారు. ప్రస్తుతం దీనికి సంబంధించిన వీడియో సోషల్ మీడియాలో వైరల్గా మారింది. ఈ ఘటన బిహార్లోని బేతియా జిల్లాలో జరిగింది.
అసలేం జరిగిందంటే?
బేతియా జిల్లా నౌతన్ పోలీస్ స్టేషన్ పరిధిలోని ఓ గ్రామంలో యువతి నివసిస్తోంది. ఆమె అదే గ్రామానికి చెందిన ఓ యువకుడితో ఆమె ప్రేమలో పడింది. అయితే, పగలు ప్రియుడిని కలిస్తే ఎవరైనా చూస్తారని.. రాత్రి సమయంలో కలుద్దామని నిర్ణయించుకుంది. ఆ ప్లాన్ను ప్రియుడికి చెప్పి.. ఆ సమయంలో వారిని ఎవరూ చూడకుండా ఉండేందుకు ఓ ఉపాయం ఆలోచించింది. ప్రతి రోజు ప్రియుడిని కలుసుకునే సమయానికి ట్రాన్స్ఫార్మర్ వద్దకు వెళ్లి విద్యుత్ సరఫరా నిలిపివేసేది. అనంతరం వారిద్దరు ఏకాంతంగా గడిపేవారు.
అయితే, ప్రతి రోజు కరెంట్ ఎందుకు పోతుందో గ్రామస్థులకు అర్థం కాలేదు. ఈ విషయంపై ఆరా తీయగా.. ఓ యువతి ఇలా చేస్తోందని తెలిసింది. ఆ తర్వాత వారిద్దరూ ఏకాంతంగా ఉన్న సమయంలో గ్రామస్థులు రెడ్హ్యాండెడ్గా పట్టుకున్నారు. యువకుడికి దేహశుద్ధి చేశారు. యువతిని నిలదీశారు. ఈ ఘటనను ఓ స్థానికుడు వీడియో తీయగా.. ప్రస్తుతం అది వైరల్గా మారింది.
ఆ వీడియో పోలీసుల దృష్టికి వెళ్లింది. దీనిపై స్పందించిన పోలీసులు ప్రేమ జంటను పోలీస్ స్టేషన్కు రప్పించి.. వారి తల్లిదండ్రులను పిలిపించారు. ఇరు వర్గాల మధ్య సంధి కుదిర్చారు. కుటుంబ సభ్యులు పెళ్లికి ఒప్పుకోవడం వల్ల వివాదం సద్దుమణిగింది. దీంతో యువతీయువకులను పోలీసులు విడిచిపెట్టారు. అయితే, ఆ యువతి వల్ల గ్రామం పరువుపోతోందని.. ఆమె కరెంట్ తీయడం వల్ల ఊళ్లో దొంగతనాలు జరుగుతున్నాయని ఓ గ్రామస్థుడు ఆరోపించాడు. ఇప్పటివరకు రెండు బైక్లు, కరెంట్ మోటార్లు, చాలా వరకు మేకలు చోరీకి గురయ్యాయని తెలిపాడు.
పెళ్లి మండపం నుంచి వరుడు పరార్.. 20కి.మీ వెంబడించిన వధువు..
మే నెలలో ఉత్తర్ప్రదేశ్లో ఓ వింత సంఘటన వెలుగు చూసింది. పెళ్లి పీటల వరకు వచ్చిన వివాహాన్ని వద్దంటూ మండపం నుంచే పారిపోయాడు ఓ వరుడు. ఇది తెలుసుకున్న ఆ వధువు అతడిని 20 కిలోమీటర్ల మేర బస్సులో వెంబడించి మరీ పట్టుకుంది. మరి చివరకు వీరి పెళ్లి జరిగిందో.. లేదో.. తెలుసుకోవాలంటే ఈ లింక్పై క్లిక్ చేసి పూర్తి కథనం చదవండి.
