అరుదైన క్యాన్సర్తో బాధపడుతున్న ఓ రోగి కడుపులో నుంచి 30 కిలోల కణితిని తొలగించారు ఉత్తర్ప్రదేశ్లోని వారణాసి వైద్యులు. దాదాపు ఆరు గంటల పాటు ఈ ఆపరేషన్ కోసం వైద్యులు శ్రమించారు. వారణాసిలోని మహామన పండిట్ మదన్ మోహన్ మాళవియా క్యాన్సర్ సెంటర్లో ఈ ఆపరేషన్ జరిగింది. దేశంలోనే ఇదోక అతిపెద్ద ఆపరేషన్గా వైద్యులు చెబుతున్నారు. 55 ఏళ్ల వ్యక్తి కడుపులో ఆ భారీ కణితిని గుర్తించిన వైద్యులు.. అనంతరం ఆపరేషన్ చేసి దాన్ని తొలగించారు.
ఆసుపత్రి శస్త్రచికిత్స విభాగం అసోసియేట్ ప్రొఫెసర్ అయిన డాక్టర్ మయాంక్ త్రిపాఠి ఈ ఆపరేషన్ గురించి వివరించారు. "కడుపు నొప్పితో ఓ 55 ఏళ్ల వ్యక్తి మమ్మల్ని సంప్రదించాడు. అతడు అప్పటికే రెట్రోపెరిటోనియల్ లిపోసార్కోమా అనే అరుదైన క్యాన్సర్తో బాధపడుతున్నాడు. అతడికి వివిధ రకాల వైద్య పరీక్షలు నిర్వహించాం. అనంతరం.. అతడి కడుపులో 30 కిలోల కణితిను గుర్తించాం. దాదాపు ఆరు గంటలపాటు కష్టపడి ఈ ఆపరేషన్ పూర్తి చేశాం. కడుపులో చాలా సున్నితమైన ప్రదేశంలో కణితి ఉన్న కారణంగా.. ఆపరేషన్కు చాలా సమయం పట్టింది" అని ఆయన తెలిపారు.
ఈ కణితి బరువు.. అప్పుడే పుట్టిన 12 మంది పిల్లలతో సమానమని డాక్టర్ మయాంక్ త్రిపాఠి తెలిపారు. ఈ కణితి 34 సెంటీమీటర్ల పొడవు, 46 సెంటీమీటర్ల వెడల్పు ఉందని వెల్లడించారు. బహుశా ఇది దేశంలోనే అతిపెద్ద కణితి అయిండొచ్చని ఆయన అభిప్రాయపడ్డారు. ఈ ఆపరేషన్ విజయవంతంగా పూర్తవడం పట్ల పేషెంట్ కుటుంబ సభ్యులు ఆనందం వ్యక్తం చేస్తున్నారు. వైద్యులకు కృతజ్ఞతలు చెబుతున్నారు.
